Azərbaycan, Bakı, 23 iyul/ Trend , müxbir S.Əliyev/ Azərbaycanın Dövlət Neft Şirkətinin Kulevidəki (Gürcüstan) Qara dəniz neft terminalı istifadəyə verildikdən sonra, onun vasitəsilə təqribən 200 min ton neft məhsulu aşırılıb. Bu barədə çərşənbə günü SOCAR Energy Georgia şirkətinin rəhbəri Mahir Məmmədov məlumat verib. Aşırmanın əsas həcmi Azərbaycan Dövlət Neft Şirkətinin müqavilələr üzrə reallaşdırılan neft məhsullarının payına düşür.
Ekspertlərin qiymətləndirmələrinə görə, yaxln vaxtlarda bu terminal vasitəsilə aşırma həcmi artacaq. Bu, ilk növbədə, Chevron şirkətinin Qazaxıstanın "Tengiz" yatağından hasil edilən neftinin bu terminal vasitəsilə nəqli hesabına baş verəcək.
Amerika şirkəti Qazaxıstanda hasil etdiyi neftin Azərbaycan Dövlət Xəzər Dəniz Gəmiçiliyinin tankerləri ilə daşınmasına dair müqavilə bağlyıb. Müqavilə 2 ildə 2 mln. ton neftin daşınmasını nəzərdə tutur. O, Azərbaycan ərazisi vasitəsilə nəql olunacaq.
Şirkət ümumilikdə Azərbaycan ərazisi ilə təqribən 5 mln. ton nəql etmək niyyətindədir. Neftin bir hissəsi Qazaxıstanın tankerləri ilə daşınacaq.
Chevron Qazaxıstanın "Tengiz" yatağının operatorudur. "Tengiz"dən hasil edilən neft BTC Co şirkətinin idarə etdiyi Bakı -Tbilisi - Ceyhan (BTC) boru kəməri ilə, həmçinin, dəmir yolu vasitəsilə Gürcüstanın Kulevi və Batumi limanlarına nəql ediləcək.
Chevron nefti "Tengiz" quru yatağından dəmir yolu ilə Qazaxıstanın Xəzər sahilindəki Aktau limanına, buradan da tankerlərlə Bakıya çatdırılacaq. Bakı limanından neft BTC boru kəmərinin girişinin yerləşdiyi "Səngəçal" terminalınadək (operator BP) çatdırılacaq.
Neft Gürcüstanın limanlarınadək dəmir yolu nəqliyyatı ilə çatıdırılacaq. Gürcüstanın Kulevi Qara dəniz terminalının sahibi Azərbaycanın Dövlət Neft Şirkəti, Batumi limanının sahibi isə, Qazaxıstandır.
Kulevi terminalının aşırma gücü 9 mln. ton təşkil edir (2 mln. ton xam neft, 3 mln. ton dizel yanacağı, 4 mln. ton mazut). Terminalın çən parkının ümumi tutumu 320 min tondur. Aşırma gücünü 20 mln. tonadək artırmaq və çən parkını 380 min kubmetrədək genişləndirmək planlaşdırılır.
Bu il Kulevi terminalında quru yüklər və mayeləşdirilmş qazın (LPG) aşırılması üçün terminalın tikintisinə başlamaq nəzərdə tutulur.
Müəlliflə əlaqə saxlamaq üçün elektron ünvan: [email protected]
