Azərbaycan, Bakı, 20 avqust / Trend , müxbir E.İsmayılov/ Azərbaycanın Kulevi terminalı Gürcüstanda yaranan vəziyyətlə əlaqədar neft yüklərinin aşırmasını hələ bir həfə həyata keçirə bilər. Bu barədə çərşənbə günü telefonla Trend -a terminaldan bildiriblər.
"Aşırılma üçün terminaldakı neft məhsullarının həcmi hələ bir həftə bəs edəcək", -deyə terminaldan bildiriblər.
Şənbə günü Gürcüstanın Kaspi şəhəri yaxınlığında körpünün partladılmasına görə Azərbaycan və Mərkəzi Asiyadan bu ölkənin Qara dəniz limanlarına neft və neft məhsullarının nəqli dayandırılıb. Hazırda körpüdə təmir işləri aparılır və işlərinnə vaxt başa çatdırılcağı bilinmir.
"Hazırkı neft məhsulları ehtiyatları tükəndikdən sonra, biz dəmir yolu hərəkətinin bərpa edilməsini gözləyəcəyik", - deyə terminaldan bildiriblər.
Yüklərin müvəqqəti olaraq nəql edilməsi planlaşdırılan alternativ dəmir yolu körpüsündə təmir işləri bir neçə gün çəkib. Azərbaycan Dövlət Dəmir Yol İdarəsindən çərşənbə günü verilən məlumata görə, onun dayanıqsızlığı səbəbindən ekspertlər bu körpü ilə neft və neft məhsulları nəqlinin yararsız olduğu qənaətinə gəliblər. Ola bilsin ki, bu körpü ilə aztonnajlı yüklər nəql olunsun.
Kulevi terminalı eyni vaxtda 168 sistern-vaqonu qəbul edə bilər. Terminalın ümumi aşırma gücü 2 mln. ton xam neft, 3 mln. ton dizel yanacağı, 4 mln. ton mazut daxil olmaqla ildə 10 mln. maye neft məhsulları təşkil edir. Terminalın çən parkının ümumi tutumu 320 min kubmetrdir. Terminalın illik gücünü 15- 20 mln. tonadək artırmaq, çən parkını 380 min kubmetrədək genişləndirmək planlaşdırılır. Terminal dörd dəmir yolu, giriş kanalı və üç yanalmaya malikdir.
Məqalə müəllifi ilə əlaqə ünvanı: capital
