Azərbaycan, Bakı, 22 sentyabr/ Trend , müxbir E.İsmayılov/ Azərbaycan Dövlət Neft Şirkətinin (ARDNŞ) Kulevi neft terminalına rəhbərlik edən SOCAR Georgia şirkəti Gürcüstan hökumətindən neft və neft məhsullarının illik aşırma həcminin müəyyən edilməsi üçün iki aylıq möhlət alıb. Bu barədə şirkətin baş direktoru Mahir Məmmədov bildirib.
"Bizim istehsal ilimiz faktiki olaraq 12 ay deyil, 14 ay təşkil edəcək", - deyə o bildirib.
Məmmədovun əvvəllər bildirdiyinə görə, Gürcüstanda ildə 4 mln. ton neft və neft məhsulları daşıyan şirkətə nəqliyyat tarifi üzrə güzəştin verilməsinə dair qayda var.
Şirkət gürcü-osetin münaqişəsi və Qara dəniz limanlarının bağlı olması səbəbindən daşıma həcminin obyektiv şəkildə enməsi ilə əlaqədar Gürcüstan hökumətinə müraciət edib.
"Biz bu müddətlə kifayətlənməyə çalışacağıq, mümkün olmasa, yenə də möhlət istəyəcəyik. Fors-major və hərbi əməliyyatlar açıq aydın görunur, bizdə hətta Gürcüstanın Ticarət-Sənaye Palatasının sənədləri də var", - deyə Məmmədov bildirib.
Hazırda şirkət Gürcüstandan gündə 5-6 min ton, ayda isə 150-200 min ton maye yükləri daşıyır. Məmmədov əvvəllər bildirib ki, yüklərin əsas hissəsini mazut və dizel yanacağı, bir qismini isə neft təşkil edir.
Kulevi terminalı bu il istifadəyə verilib. Terminalın ümumi aşırma gücü 2 mln. ton xam neft, 3 mln. ton dizel yanacağı, 4 mln. ton mazut daxil olmaqla ildə 10 mln. maye neft məhsulları təşkil edir. Kulevi terminalı eyni vaxtda 168 sistern-vaqonu qəbul edə bilər. Terminalın çən parkının ümumi tutumu 320 min kubmetrdir. Liman 100 min tonadək ağırlıqda tankerləri qəbul edə bilər ki, bu da layihəni iqtisadi cəhətdən səmərəli edir. İki il ərzində terminalın illik gücünün 15-20 mln. tonadək artırılması planlaşdırılır.
SOCAR Georgia şirkətinin həmtəsisçiləri aşağıdakılardır: ARDNŞ ї 51 faiz, Petro-Trans FZCO ї 32,7 faiz və İvan Çxartişvili ї 16,3 faiz.
Məqalə müəllifi ilə əlaqə ünvanı: [email protected]
