...

Kuba enerji sahəsində Azərbaycanla əməkdaşlıqda maraqlıdır – səfir

Energetika Materials 26 Sentyabr 2008 16:37

Trend-i buradan izləyin

Azərbaycan, Bakı, 26 sentyabr/ Trend , müxbir S.Ağayeva/ Kuba enerji sahəsində Azərbaycanla əməkdaşlıqda maraqlıdır.

"Azərbaycan, enerji resursları ixrac edən ölkə kimi əməkdaşlıq baxımından Kubada böyük maraq yaradır", - deyə Trend - a Kubanın Bakıdakı səfiri Marselo Torres (Marcelo Caballero Torres) bildirib.

"Bu gün Kubanın enerji resurslarına olan tələbatının əsas hissəsini Venesuela ödəyir. Bu, məlum olduğu kimi, bir dövlətdən asılılıq yaradır və hökumət hazırda ölkənin enerji ehtiyatlarına olan tələbatını təmin etmək üçün alternativ variantları nəzərdən keçirir", - deyə səfir bildirib.

Onun sözlərinə görə, iki ölkə əməkdaşlığının digər istiqamətləri Azərbaycandan müasir texnologiyalar və neft - qaz sənayesi avadanlıqlarının alınması ola bilər.

"Yaxın vaxtlarda Bakya işgüzar səfər edəcək Kubanın baza sənayesi nazirinin birinci müavini Azərbaycan hökuməti ilə əməkdaşlığın inkişafı imkanlarını müzakirə etmək niyyətindədir", - deyə Marselo Torres bildirib.

Azərbaycan və Kuba arasında iqtisadi münasibətlər ötən ildən yeni mərhələyə qədəm qoyub. 2007 - ci ilin sonunda Havanada iqtisadi əməkdaşlıq üzrə Azərbaycan - Kuba hökumətlərəarası komissiyasının ilk iclası keçirilib. İclasda Azərbaycan və Kuba arasında mövcud iqtisadi əlaqələrin vəziyyəti və onların inkişaf perspektivləri nəzərdən keçirilib.

Ötən ilin yekunu üzrə Azərbaycanın ümumi mal döriyyəsi həcmində Kuba ilə ixrac - idxal əməliyyatlarının xüsusi çəkisi 0,002 faiz ($260,6 min), ümumi ixracında 0,004 faiz təşkil edib. Kubadan, əsasən, siqaretlər idxal olunur, Azərbaycandan bu ölkəyə turbovintli mühərriklər (ixracın 61,6 faizi), vertolyot və təyyarələr üçün ehtiyat hissələri (32,3 faiz) və maye nasosları (6,2 faiz) ixrac olunur.

Azərbaycanın rəsmi statistikasına görə, 2008 - ci ilin birinci yarısında ölkələr arasında xarici ticarət dövriyyəsi, ixrac həcmi sıfır olmaqla, 8,3 min dollar təşkil edib. Lakin yalnız iyul ərzində mal dövriyyəsi Azərbaycan mallarının ixracı hesabına 156 min dollar təşkil edib.

İki ölkənin biznes dairələri arasında əlaqələrin qurulması və sərmayə mühiti ilə tanışlıq üçün Azərbaycan İxrac və İnvestisiyaların Təşviqi Fondu və İqtisadi İnkişaf Nazirliyi ölkədə biznes - forum təşkil etməyi planlaşdırır.

Məqalə müəllifi ilə əlaqə ünvanı - trend

Xəbər lenti

Xəbər lenti