Azərbaycan, Bakı, 10 noyabr/ Trend müxbir S.Əliyev/ "Şahdəniz" yatağında beşinci quyunun istismara verilməsi tarixi bu ildən 2009 - cu ilin əvvəlinə keçirilsə də, qazın cari ilə proqnozlaşdırılan tədarük həcmində azalma gözlənilmir. Quyunun qazılmasının başa çatdırılması tarixinin dəyişdirilməsi texniki problemlərlə əlaqələndirilir.
BP şirkətinin ("Şahdəniz" layihəsinin texniki operatoru) proqnozlarına əsasən, cari il ərzində 7,7 mlrd. kubmetr qaz hasil etmək planlaşdırılır. Hazırda yataqdakı dörd quyudan 22 mlrd. kubmetr qaz hasil edilir.
Türkiyə bu həcmdən sutkada təxminən 13 - 14 mln. kubmetr, Azərbaycan 6 - 7 mln. kubmetr, Gürcüstan 1 mln. kubmetr qaz alır.
"Şahdəniz" yatağının işlənilməsinə dair saziş 1996 - cı il iyunun 4 - də imzalanıb. Saziş iştirakçıları bunlardır: BP (operator- 25,5%), Statoil (25,5%), NICO, Total, LUKAgip (10%), TPAO (9%), ARDNŞ (10%).
Yataqda hasilata 2006 - cı ilin dekabrından başlanıb. Hazırda xammal Cənubi Qafqaz qaz kəməri vasitəsilə Gürcüstan və Türkiyəyə nəql olunur. Azərbaycan da qaz alıcısı qismində çıxış edir.
Yatağın işlənilmə layihəsinin brinci mərhələsi çərçivəsində ildə 8,8 mlrd. kubmetr qaz hasil ediləcəyi güman olunur. Bu həcm Azərbaycan, Gürcüstan və Türkiyəyə satılacaq. Reallaşdırılmasına 2012 - ci ildə başlanacaq ikinci mərhələ çərçivəsində hasilat 20 mlrd. kubmetrədək artırlacaq. Bu mərhələ qazın Avropa ölkələrinə nəqli nəzərdə tutulub.
Müəlliflə əlaqə saxlamaq üçün elektron ünvan: [email protected]
