Gürcüstan, Tbilisi, 12 noyabr/ Trend , müxbir N.Kirtsxaliya/ Gürcüstanın keçmiş Baş naziri təsdiqedib ki, RF-nin hərbi təyyarələri gürcü - osetin münaqişəsi zamanı Bakı - Supsa və Bakı - Tbilisi - Ceyhan neft kəmərlərini raket atəşinə tutublar.
"Biz bu barədə açıq bəyan etsək də, neftin Gürcüstan ərazisindən tranzit nəqli ilə məşğul olan tərəfdaşlarımızın maraqlarını nəzərə almaqla, artıq qalmaqal yaratmaq istəmədik", - Vladimir Qurgenidze çərşənbə günü avqust hadisələrinin öyrənilməsi üzrə müvəqqəti parlament komissiyasının iclasında bildirib.
Onun sözlərinə görə, BP şirkəti və digər tərəfdaşlar işin xeyri üçün Rusiyanın neft kəmərlərinə raket zərbələri endirməsi barədə susublar.
"Mənim şəxsi rəyimə görə, bu şirkətlər öz səhmlərini dünyanın aparıcı əmtəə birjalarında yerləşdirirlər və raket bombardmanı ətrafında qalmaqal bu firmaların qiymətli kağızlarının dəyərini azalda bilərdi", - Qurgenidze bildirib.
"Hadisələrin belə inkişafı bizim maraqlarımıza da daxil deyildi və raket zərbələri haqqında xəbər versək də, bu şirkətlərin susması fonunda, Gürcüstanın bəyanatları eşidilmədi", - o vurğuladı.
Bakı - Supsa və Bakı - Tbilisi - Ceyhan neft kəmərləri ilə "Azəri - Çıraq - Günəşli" dəniz yataqları blokundan hasil edilən yüngül Azərbaycan nefti nəql edilir. Bu üç layihənin operatoru BP şirkətidir.
Müəlliflə əlaqə saxlamaq üçün elektron ünvan: [email protected]
