Azərbaycan, Bakı, 24 noyabr/ Trend , müxbir E.İsmayılov/ "Çernomortexflot" ASC və Gürcüstanın Dəniz Administrasiyası dekabrın 1-dək Gürcüstanın Kulevi limanında Azərbaycanın neft terminalının (SOCAR şirkətinə məxsusdur) yaxınlığında batmış "Skadovsk" dibdərinləşdirici gəminin dənizin dibindən qaldırılması üzrə müqavilə imzalayacaqlar, - terminalda işlərə yaxın mənbə bazar ertəsi bildirib.
"Çernomortexflot" şirkətinə məxsus "Skadovsk" gəmisi iritonnajlı gəmilərin limana daxil olmasına şərait yaratmaq məqsədilə dənizin dibinin dərinləşdirilməsi üzrə işlər aparırdı. Qəza terminalın işinə heç bir şəkildə təsir göstərməyib. Gəmilərin limana daxil olmasına maneələr yoxdur.
"Şirkətlər müqavilə imzaladıqdan sonra, gəminin dənizin dibindən bütöv şəkildə çıxarılması üzrə işlər başlayacaq", - mənbə bildirib. Əvvəllər gəminin əvvəlcə kəsiləcəyi və yalnız bundan sonra hissə-hissə çıxarılacağı planlaşdırılırdı.
Gəmidən yanacağın axmasından və ekoloji faciədən qaçmaq məqsədilə, göyərtədə olan dizel yanacağı və sürtkü yağının çəkilməsi həyata keçirilib.
Ümumilikdə gəmidə 25-30 ton dizel və beş ton yağ olub. Yanacağın gəmidən çəkilməsi üçün işləri ukraynalı, gürcüstanlı və azərbaycanlı mütəxəssislər həyata keçirib.
"Skadovsk" fırtına nəticəsində (6 -7 ballıq fırtına) sentyabrın 30 - da saya oturub və deşilib. Sonra Ukraynadan mütəxəssislər gəlib və "Skadovsk"u saydan yedək vasitəsilə çıxarmağı qərara alıblar. Oktyabrın 3 - də yedəkləmə işləri zamanı gəmi çevrilib,- mənbə əvvəllər bildirib.
Gəmi qəzası nəticəsində gəmi kapitanı və iki ekipaj üzvü həlak olub. Cəsədlərin axtarışı bir neçə gün davam edib. Gəminin göyərtəsində olan 31 nəfərin 28-i xilas edilib.
Müəlliflə əlaqə saxlamaq üçün elektron ünvan: [email protected]
