Azərbaycan, Bakı, 29 noyabr/ Trend / SOCAR şirkəti (Azərbaycan Dövlət Neft Şirkəti) həftə ərzində "Şimal" elektrik stansiyası və Bakı ətrafının qazla təminatı üçün nəzərdə tutulan Bahar-Hövsan-Suraxanı yeni qaz kəmərinin sualtı hissəsinin tikintisini başa çatdıracaq. Bu barədə SOCAR-ın məlumatında bildirilir. Boru kəmərinin 3,5 kilometrlik sualtı hissəsinin çəkilməsi işləri qalıb.
Bu qaz kəmərinin sualtı hissəsinin 30,3 km.-i artıq çəkilib. Boru çəkilişlərini boru kəməri çəkən "Suleyman Vəzirov" gəmisi həyata keçirir.
20 düyümlük Bahar-Hövsan-Suraxanı boru kəmərinin ümumi uzunluğu 44 km-dır, sutkalıq nəql gücü isə beş mln. kubmetr qaz təşkil edir. Qaz kəməri dənizin 12-16 metr dərinliyindən keçir. Boru kəmərinin sualtı hissəsinin sifarişçisi "28 may" Neft-Qaz Çıxarma İdarəsi, quru hissəsini sifariş edən isə Qaz Əməliyyatları İdarəsidir.
Boru kəməri ilə "Günəşli" dəniz yatağından çıxarılan qaz nəql olunacaq. Qaz kəməri layihəsi "Dənizneftqazlayihə" İnstitutu tərəfindən hazırlanıb. Bu boru kəməri üçün boruların betonlanması işini Caspian Pipe Coatings zavodu reallaşdırıb. Qaz kəməri 2008-ci ildə ARDNŞ-ın qaz proqramı çərçivəsində istifadəyə veriləcək iri obyektlərdən biridir.
Yeni boru kəmərinin çəkilməsi çərçivəsində yeni qaztəmizləmə qurğusunun tikintisi həyata keçirilir. İşlərin artıq 95 faizi görülüb: üç təmizləyici, üç nasos və təmizləmə nəticəsində əldə olunan kondensat və kerosinin saxlanılması üçün üç anbar tikilib.
Proqram SOCAR-ın şəxsi vəsaiti hesabına istismar etdiyi yataqlardan qaz hasilatının ildə səkkiz mlrd. kubmetrədək artırılmasını nəzərdə tutur. Bu həcmin yeddi mlrd. kubmetri dövlətə təhvil veriləcək.
SOCAR-ın rəsmi saytında bildirilir ki, Caspian Pipe Coatings zavodunda iştirak payının 50 faizi ARDNŞ-a, 45 faizi Azertrans şirkətinə və beş faiz Azinvest-ə məxsusdur..
