Azərbaycan, Bakı, 12 dekabr/ Trend , müxbir E.İsmayılov/ ""Azərenerji" SC 2009-cu ilin ortalarınadək Azərbaycan və İran arasında enerji mübadiləsinin hazırki 200 MVt-dən 700 MVt-dək artırılması layihəsi çərçivəsində bütün işləri başa çatdırmağı planlaşdırır", - "Azərenerji"nin rəhbəri Etibar Pirverdiyev cümə günü bildirib.
Onun sözlərinə görə, "gələn ilin ortalarınadək bu istiqamətdə qalan işləri bitirəcəyik".
Bu layihə çərçivəsində 350 kilometrdən çox yüksək gərginlikli elektrik ötürücü xəttinin (EÖX) çəkilməsi nəzərdə tutulur və eyni zamanda, bir neçə yarımstansiya yenidən qurulmalıdır. 220 kilovoltluq yeni "Salyan" yarımstansiyası tikilməlidir və "biz bu yarımstansiyada işləri artıq başa çatdırmışıq", - Pirverdiyev dəqiqləşdirib.
Layihənin realizəsi Naxçıvan Muxtar Respublikasına 150 MVt-dək və ümumilikdə qış dövründə Azərbaycanın enerji sisteminə 400 MVt elektrik enerjisi tədarükü üçün Azərbaycana imkan verəcək.
Proqram İranın Sunir şirkəti ilə birlikdə realizə olunur və 330 kilovoltluq Əli Bayramlı İES - İmşli EÖX, ikinci İmişli - Parsabad xətti, 220 kilovoltluq Əli Bayramlı İES - Salyan, Salyan -Masallı, Masallı - Astara EÖX-ü, "Salyan" yarımstansiyasını və daha dörd yarımstansiyanı özündə birləşdirir. EÖX-ün ümumi uzunluğu 350 km olacaq.
Müəlliflə əlaqə saxlamaq üçün elektron ünvan: [email protected]