Azərbaycan, Bakı, 23 dekabr/ Trend , müxbir E.İsmayılov/Beynəlxalq maliyyə böhranı ilə əlaqədar, SOCAR - ın Türkiyədə neft emalı zavodunun (NEZ) tikintisi üçün sərmayələrinin həcminə düzəlişlər ediləcək, - SOCAR-ın yüksək vəzifəli nümayəndəsi deyib.
Bu müəssisə SOCAR - ın iştirak etdiyi şirkətlər Alyansına məxsus Petkim neft - kimya kompleksinin xammalla təmin edilməsi üçün lazımdır.
"Dörd milyard dollar civarında məbləği altı ay əvvəlki qiymətlərlə dəyərləndirsək, mən bunun ucuz başa gələcəyini [dəqiq] deyə bilmərəm. Təbii ki, düzəlişlər olacaq", - mənbə deyib.
Onun sözlərinə görə, böhran sərmayə və pulların cəlb edilməsində müəyyən çətinliklərə səbəb olacaq. Lakin böhranın da müsbət cəhətləri var, bazarda əksər materialların qiyməti düşür. Işçi qüvvəsinin dəyəri də azala bilər. Məhz bu səbəbdən, zəruri sərmayələrin həcmi üzrə düzəlişlər aparıla bilər.
Bu layihənin realizəsi üçün SOCAR-Turkas Rafineri şirkəti yaradılıb, lisenziyanın alınması üçün Türkiyə hökumətinə müraciət ünvanlanıb. Hazırda bu məsələ nəzərdən keçirilir, - mənbə qeyd edib.
NEZ Petkim kimya müəssisəsini birbaşa qovulmuş benzinlə təmin edəcək. Zavodun tikintisinə ən azı dörd il tələb olunacaq. NEZ-ə sərmayələr ilkin olaraq 4-5 mlrd. dollar qiymətləndirilir. Zavodun gücü ildə təxminən 8-10 mln. ton təşkil edəcək. NEZ - in tikintisini 2012-ci ildə bitirmək planlaşdırılır.
Türkiyənin iri neft - kimya kompleksi Petkim də dünya maliyyə böhranının təsirini hiss edir. "Lakin Avropa, Amerikanın neft - kimya komplekslərindən fərqli olaraq, hələ ki, möhkəm dayanmışıq", - mənbə deyib.
SOCAR-ın rəhbəri Rövnəq Abdullayevin əvvəllər bildirdiyinə görə, şirkət Petkim neft - kimya kompleksinin inkişafına təxminən 2 mlrd. dollar yatırıb.
SOCAR 2015 - ci ilə bu müəssisənin gəlirlərinin həcmini hazırki 1,9 mlrd. dollardan $4 mlrd. dollaradək artırmaq niyyətindədir. Hazırda Holdinqin istehsal gücü 3,2 mln. tona bərabərdir. 2015 - ci ilə bu göstərici 6,3 mln. tonadək artacaq. Bu gün Türkiyənin neft - kimya məhsullarına tələbatı 6,1 mlrd. dollara bərabərdir və hər il tələbat 11-12 faiz artacaq. Bu gün Petkim-in istehsalı Türkiyə bazarının təxminən 25 faizini əhatə edir.
SOCAR/Turcas Petrol/Injaz Projects şirkətləri Alyansı 2,04 mlrd. dollara Türkiyənin Petkim Kimya Konserninin səhmlərinin 51 faizini alıb. Hazırda Türkiyə zəruri kimya məhsullarının 70-75 faizini idxal edir. SOCAR/Turcas/Injaz-ın Petkimin inkişafına yatıracaqları sərmayələr məhsul idxalını 30 faizədək azaltmağa imkan verəcək.
Petkim Petrokimya Holding plastik qablaşdırma, parça, PVC, yuyucu vasitələr istehsal edir. O Türkiyədə belə yeganə belə məhsul istehsalçısıdır və istehsal etdiyi məhsulların dörddə birini ixrac edir.
Müəlliflə əlaqə saxlamaq üçün elektron ünvan: [email protected]