Azərbaycan, Bakı, 26 dekabr/ Trend , müxbir E.İsmayılov/ Qazın, elektrik enerjisi və istilik enerjisinin verilməsinin kəsilməsi və bu enerji növlərinin verilişində məhdudiyyətlərə görə fiziki, hüquqi və vəzifəli şəxslər üçün inzibati cəzaların sərtləşdirilməsi barədə təkliflər Azərbaycan parlamentinin müzakirəsinə təqdim edilib. İnzibati Xətalar Məcəlləsinə dəyişikliklərə əsasən, bu xətalara görə cəza tədbirləri artırılacaq. Məcəlləyə düzəlişləri dekabrın 30-da parlamentin plenar iclasında müzakirə etmək planlaşdırılır.
Dəyişikliklərə əsasən, bu xətalara görə fiziki şəxslər üçün 200 manatdan 500 manatadək, vəzifəli şəxslər üçün - 1000 manatdan 1500 manatadək, hüquqi şəxslər üçün - 2500 manatdan 3000 manatadək məbləğdə cərimələr tətbiq etmək nəzərdə tutulur.
Bununla yanaşı, "elektrik və istilik enerjisindən istifadə qaydalarının pozulması üzrə" enerjidən istifadəyə görə ödənişin müqavilə ilə müəyyən edilmiş müddətdə ödənilməməsinə görə, enerji təchizatı üzrə müəssisə tərəfindən ayrıldıqları şəbəkəyə qanunsuz qoşulmalarına görə maddədən fiziki şəxslər (20 - 40 manat məbləğdə), vəzifəli şəxslər (60 - 90 manat) və hüquqi şəxslərə (150 - 300 manat) qarşı cərimələrin tətbiqini nəzərdə tutan bənd çıxarılıb.
Qazın, elektrik və istilik enerjisinin oğurlanması nəticəsində kiçik ölçüdə vurulmuş zərərə görə, fizki, vəzifəli və hüquqi şəxslər üçün, müvafiq olaraq, 30 - 40 manat, 70 - 90 manat və 150 - 300 manat cərimə nəzərdə tutulub.
Dəyişikliklərə əsasən, enerji mənbələrinin növləri siyahısına elektrik və istilik enerjisindən başqa, qaz da əlavə edilib.
Məcəlləyə, enerjinin istifadəsi, nəqli və paylanması dövründə dövlət standartlarının tələblərinin pozulmasını nəzərdə tutan bənd daxil edilib.
Müəlliflə əlaqə saxlamaq üçün elektron ünvan: [email protected]