Azərbaycan, Şəki, 30 yanvar/ Trend , müxbir X.Əliyeva/ Şəki rayonuna (Azərbaycanın şimal-qərbi) qaz verilişi fevralın əvvəlindən dayandırıla bilər. Bu barədə Şəki Qaz İstismar İdarəsinin müdiri Adil Mustafayev bildirib.
Bu, verilən qaza görə vəsait yığımı həcminin aşağı olması ilə izah olunur. Mustafayevin sözlərinə görə, yanvarda rayona verilən təbii qazın dəyəri cəmi 30 faiz ödənib.
"Azəriqaz" QSC-dən daxil olan məlumatda bildirilir ki, ödəmə həcmi artmasa, rayona qaz verilişi dayandırılacaq.
Mustafayev bildirib ki, hazırda əhalinin 600 min manat məbləğində borcu var. Dəfələrlə xəbərdarlıqlara baxmayaraq, borcu ödəməyən 30-dan çox abunəçiyə qaz verilişi fərdi qaydada dayandırılıb.
Bundan sonra müəyyən irəliləyişlər müşahidə olunub, lakin idarə müdirinin sözlərinə görə, ödəniş 60 faizdən artıq olmasa, ayın axırında və ya fevralın əvvəlində "Azəriqaz" QSC tərəfindən rayona təbii qaz verilişi dayandırılacaq.
Azərbaycanın şimal-qərb bölgəsində yerləşən Şəki Bakıdan 352 km məsafədədir.
Məqalə müəllifi ilə əlaqə ünvanı - [email protected]
