Azərbaycan, Bakı, 02 fevral/ Trend , müxbir E.İsmayılov/
Azərbaycanın Sənaye və Energetika Nazirliyi ilin əvvəlindən "Azəriqaz" QSC-yə qaz nasoslarından istifadənin və tərəvəzin yetişdirildiyi 25 istixanaya qaz verilişinin qarşısını almaq üçün tədbirlər görmək barədə göstəriş verib, - nazirlikdə işlərə yaxın mənbə bildirib.
Tərəvəzlərin yetişdirilməsi üçün istixanalar əsasən Bakı kəndlərində yerləşir.
"Hazırda məhz bu istiqamətdə fəal iş aparılır. Bu istixanaların sahibləri xüsusi qaz nasosları quraşdıraraq, xeyli sayda insanı qazsız qoyur. Buna görə də, onlara qarşı belə tədbirlər qəbul edilib", - mənbə deyib.
Ümumilikdə, ilin əvvəlindən qazdan qeyri-rasional istifadə edilən təxminən 50 istixana qeydə alınıb. Lakin bu istiqamətdə indi də işlər davam edir. Bu istixanaların sahiblərinə artıq pozuntular barədə xəbərdarlıq edilib və onlara nöqsanların aradan qaldırılması üçün fevralın 5-dək vaxt verilib.
"Bu problemlər həll olunmazsa, onlara qarşı müvafiq tədbirlər görüləcək", - mənbə deyib.
Müəlliflə əlaqə saxlamaq üçün elektron ünvan: [email protected]
в
