Azərbaycan, Bakı, 07 fevral / Trend / SOCAR şirkəti (Azərbaycan Dövlət Neft Şirkəti) 2009-cu ilin yanvar ayında Bakı-Supsa qərb boru kəməri marşrutu ilə "Azəri-Çıraq-Günəşli" yataqları blokundan hasil edilən təqribən 287,1 min ton yüngül neft ixrac edib. Bu barədə SOCAR-ın Marketinq və İqtisadi Əməliyyatlar İdarəsinin məlumatında bildirilir.
Ümumilikdə 2008-ci ildə bu boru kəməri ilə 407,1 min ton neft ixrac olunub. 2007-ci ildə boru kəmərində təmir işlərinin aparılması səbəbindən bu istiqamətdə neft nəql olunmayıb.
Bakı-Supsa boru kəmərinin operatoru BP şirkətidir. Bu boru kəməri ilə neft nəqli 2008-ci il noyabrın əvvəlində dayandırılıb.
Boru kəməri 2006-cı ilin sonundan təmirdədir. 2008-ci ilin ortalarında boru kəmərinə neft vurulmağa başlanıb, lakin gürcü-osetin münaqişəsi səbəbindən bu proses dayandırılıb.
SOCAR şirkəti yanvarda dəmir yolu ilə Gürcüstanın Batumi limanı vasitəsilə ixrac həyata keçirməyib. Ümumilikdə 2008-ci ildə bu marşrut üzrə "Azəri-Çıraq-Günəşli" yataqları blokundan hasil edilən 326,03 min ton neft ixrac olunub. Bu göstərici 2007-ci ildə 221,2 min tona bərabər olub.
