Azərbaycan, Bakı, 31 mart / Trend , müxbir Ü.İsmayılova, E.İsmayılov /
"Rusiyanın Tambov vilayətinin rəhbərliyi Heydər Əliyev adına Bakı Neft Emalı Zavoduna (NEZ) orada istehsal olunan avtomobil benzininin keyfiyyətinin yüksəldilməsi üçün lazım olan aşqarları tədarük etmək barədə istəyini bildirib", - çərşənbə axşamı Tambov vilayətinin Regionlararası və Beynəlxalq Əlaqələri İdarəsinin rəisi Oleq Kodakov deyib.
"Biz Azərbaycanda "Avro-2" və "Avro-3" standartlı benzin istehsal etmək və sonradan beynəlxalq bazara çıxmaq məqsədilə aşqarlar tədarük etmək istəyirik", - Kodakov bildirib.
2008-ci ildə Azərbaycanda ümumilikdə, 1,3 milyon ton avtomobil benzini istehsal edilib. Bir il əvvəl bu rəqəm 1,1 milyon ton olub. Ötən il Azərbaycanın daxili bazarında 229 min ton avtomobil benzini realizə olunub.
SOCAR-ın (Azərbaycan Dövlət Neft Şirkəti) Marketinq və İqtisadi Əməliyyatlar İdarəsi (MİƏİ) 2008-ci ildə təxminən 385 min ton avtomobil benzini ixrac edib.
Azərbaycanın NEZ-ləri 2008-ci ildə 7,3 milyon tondan çox neft məhsulları istehsal edib.
Azərbaycanda neft məhsulları cəmi gücü ildə 20 milyon ton olan iki Bakı NEZ-nin bazasında istehsal olunur. Hər iki NEZ hər il öz vəsaitləri hesabına su və qurudakı yataqlardan əldə etdiyi altı milyon nefti emal edən SOCAR-a daxildir.
Məqalə müəllifi ilə əlaqə ünvanı: [email protected]