Azərbaycan, Bakı, 04 aprel / Trend /
Ekol Muhəndislik Xidmətləri QSC yaxın günlərdə "Kürsəngi" və "Qarabağlı" yataqlarını istismar edən Salyan Oil əməliyyat şirkətinin buruq şlamlarından təmizlənmiş bəzi mədən sahələrində bioloji bərpa işlərinə başlayacaq. Bu barədə QSC-nin məlumatında bildirilir.
Cari ilin birinci rübündə QSC şirkətin mədən sahələrində yerləşən səkkiz çənini xüsusi olaraq ayrılmış sahəyə daşınan 12 min kubmetrdən çox buruq şlamından təmizləyib. Məlumatda bildirilir ki, çənlər 3,4 min ton çirkləndirilmiş sulardan da təmizlənilib.
Məlumatda bildirilir ki, bu sahələrə 12,4 kubmetr qrunt gətirilib və biobərpa üçün işlər görülüb.
Ekol QSC və Salyan Oil arasında şlamların bərpası üzrə müqavilə 2008-ci il 25 dekabr tarixində imzalanıb.
İlkin araşdırmalara görə, bu yataqların mədən sahələrində təqribən 40 min kubmetr şlam yığılıb. Layihənin reallaşdırılmasına 2009-cu ilin yanvar ayında başlanılıb və ilin sonunda başa çatacaq.
Bu layihənin reallaşdırılmasının əsas əhəmiyyəti bu sahələrin ekoloji vəziyyətinin yaxşılaşdırılması, QSC-nin yeni tərəfdaşları ilə münasibətlərin genişləndirilməsi və beynəlxalq maliyyə böhranı şəraitində müəssisənin iqtisadi imkanlarının yaxşılaşdırılmasından ibarətdir.
2009-cu ildə Salyan Oil şirkəti istifadə olunan yataqlarda dörd istismar quyusu qazmağı planlaşdırır.
2006-cı il 1 mart tarixində Abşeron yarımadasında mövcud olan ekoloji problemlərin həlli üçün yaradılan Ekol Muhəndislik Xidmətləri QSC-nin təsisçiləri bunlardır: SOCAR (Azərbaycan Respublikası Dövlət Neft Şirkəti) - 51 faiz və Lancer S.A. Services - 49 faiz.
