Azərbaycan, Bakı, 25 aprel / Trend /
"Azərbaycan Xəzərdə hasil edilən qazın uzunmüddətli tranzit və kommersiya baxımından daha etibarlı, birbaşa istehlak bazarlarına çıxışı olan tədarük marşrutlarının axtarışı üzrə fəal iş aparır. Bu işlər Avropa Komissiyası, maraqlı ölkələr və şirkətlər tərəfindən cənubi enerji dəhlizi konsepsiyası çərçivəsində aparılır", - Aşqabaddakı beynəlxalq enerji konfransında SOCAR prezidenti Rövnəq Abdullayev deyib.
"Biz tranzit ölkələr arasında həm istehsalçı, həm də istehlakçı ölkələr üçün etibarlı və uzunmüddətli tərəfdaş görürük. Bu ölkələr ərazilərində tranziti ən şəffaf qiymətlər mexanizmi ilə həyata keçirməlidirlər. Qazın ixracı və nəqli zamanı nəzərə alınan bu mexanizmlər nəqliyyat dəhlizlərinin fasiləsiz və davamlı fəaliyyətinə etibarlı təminat yaradacaq", - Abdullayev Azərbaycanın tranzit potensialını qeyd edərək deyib.
Abdullayev həmçinin, qazın Avropaya tranziti, yanacağın uyğun şərtlər daxilində tranzit və ixracı üzrə əməkdaşlığa hazır olduqlarını qeyd edib.
Məqalə müəllifi ilə əlaqə ünvanı: [email protected]
