Azərbaycan, Bakı, 01 may / Trend , müxbir E.İsmayılov /
"SOCAR (Azərbaycan Respublikası Dövlət Neft Şirkəti) şirkətə daxil olan "Neft Daşları" Neft-Qaz İstehsalı İdarəsinin (NQİİ) ərazisində yeni rezervuar parkının tikintisi prosesini başa çatdırır", - cümə günü SOCAR-dakı vəziyyətlə tanış mənbə məlumat verib. Ehtiyatları yetərincə işlənmiş dəniz neft yatağı olan "Neft Daşları"nı SOCAR müstəqil şəkildə işlədir.
"Parkın tikintisi üzrə işlər demək olar ki, yekunlaşıb, ancaq prosesin tam bitməsi üçün bəzi materiallar çatışmır. Lazımi materiallar olarsa, bu prosesi bir ay ərzində bitirə bilərik", - mənbə bildirib.
Lazımi tikinti materiallarının alınması və istismara verilmənin konkret vaxtını mənbə deməyib. Əvvəllər rezervuar parkının 2008-ci ilin sonunda istifadəyə verilməsi planlaşdırılırdı.
Bu park ümumilikdə altı rezervuardan ibarət olacaq. Onlardan biri xammalın bölünməsi üçün istifadə olunacaq. Hər bir rezervuarın həcmi 2000 ton, diametri 15 metr, hündürlüyü 12 metrdir.
SOCAR geoloqlarının dəyərləndirmələrinə görə, "Neft Daşları" yatağındakı qalıq neftin həcmi 30 milyon tondur. 2010-cu ilə qədər yataqda neft hasilatının həcminin artırılması məqsədilə SOCAR 78 yeni quyu qazacaq. Yeni platformaların tikintisi planlaşdırılır.
Məqalə müəllifi ilə əlaqə ünvanı: [email protected]