Azərbaycan, Bakı, 12 iyun / Trend /
"SOCAR "Neft Daşları" neft-qaz yatağına yeni 20 düymlük qaz kəməri yollayıb", - SOCAR-ın cümə günü yaydığı məlumatda deyilir.
Qaz kəməri rekord sürətlə - 1,5 ay ərzində tikilib. Kəmərin bir hissəsi yüksək təzyiqli qazın kəmərə vurulacağı 2 №-li qaz-kompressor stansiyasına birləşib. Kəmərin ikinci ucu qazpaylayıcı meydançaya qaldırılıb ki, buradan da o, "Neft Daşları-Bahar-Qaradağ" magistral qaz kəmərinə birləşdiriləcək. Əlavə qaz kəmərinə ehtiyac 2 №-li qaz-kompressor stansiyasının üç qaz turbinli aqreqatlar hesabına genişləndirilməsindən sonra yaranıb. Genişləndirmə üzrə işlərin başa çatdırılmasından sonra stansiyanın gücü sutkada 7,4 milyon kubmetrdən 11 milyon kubmetrə qədər artacaq.
Kəmərin dənizə aparılmasını "Neftqaztikinti" tresti və SOCAR-ın Xəzər Dəniz Neft Donanması həyata keçirib.
SOCAR-ın 2009-cu ilə olan qaz proqramı çərçivəsində "Günəşli" və "Neft Daşları" yatağında 8-9 platforma arasında 15-20 kilometrlik qaz kəmərinin salınması nəzərdə tutulub.