Azərbaycan, Bakı, 20 iyul / Trend , müxbir N. Boqdanova /
Azərbaycanda istər Rusiya, istərsə də Avropaya göndərmək üçün kifayət qədər qaz var. Bunu Trend -a eksklüziv müsahibəsində Ceymstaun Fondunun (ABŞ) prezidenti Qlen Hovard deyib.
Onun sözlərinə görə, Rusiya ilə Azərbaycan arasında qaz satışı barədə müqavilə Nabukko qaz kəmərinin Azərbaycan qazı ilə təmin olunmasına heç bir problem yaratmır.
"Rusiya ilə müqavilədə elə də böyük həcm qeyd olunmayıb. Ona görə də heç bir problem yaratmır", - Hovard deyib.
Azərbaycan Xəzər regionundan Aİ ölkələrinə qaz ixracı üçün nəzərdə tutulmuş Nabukko boru kəməri üçün potensial tədarükçü hesab olunur. Qaz kəmərinin tikintisinə 2001-ci ildə başlanması planlaşdırılıb. Tədarükə 2014-cü ildə start veriləcək. Boru kəmərinin maksimal gücü ildə 31 milyard kubmetr təşkil edəcək.
Keçən il ARDNŞ (Azərbaycan Dövlət Neft Şirkəti) və Rusiyanın "Qazprom" şirkəti arasında 5 il müddətində Azərbaycan qazının alqı-satqısı və ildə minimum 500 milyon kubmetr qazın ixracının mümkünlüyü barədə müqavilə imzalanıb. Tədarükə 2010-cu ilin yanvarından başlanacaq.
Məqalə müəllifi ilə əlaqə ünvanı: [email protected]
