Azərbaycan, Bakı, 03 avqust/ / Trend /
"Ekol Mühendislik Xidmətləri" QSC "Kürsəngi" və "Qarabağlı" quru yataqlarını işlədən Salyan Oil şirkəti ilə imzalanmış müqaviləyə əsasən neft şlamının işlədilməsi və bu yataqlarda rekultivasiya layihəsinin birinci mərhələsini başa çatdırıb, bu barədə QSC-nin bazar ertəsi yayılmış məlumatında deyilir.
Məlumatda deyildiyi kimi, birinci mərhələ çərçivəsində mexaniki rekultivasiya prosesi başa çatıb. Yanvar-iyul aylarında layihə sahələrindən 35,5 min kubmetr neft şlamı və 15,6 min kubmetr çirklənmiş su kənarlaşdırılıb. Əraziyə əlavə olaraq 67,4 min kubmetr münbit torpaq daşınaraq hamarlanmışdır.
Avqust ayından layihənin yataqlarda bioloji rekultivasiyanın keçirilməsini nəzərdə tutan ikinci mərhələsi başlayacaq. İkinci mərhələnin bu ilin sonuna kimi başa çatması planlaşdırılır.
Bu layihənin həyata keçirilməsinin əsas əhəmiyyəti bu sahələrin ekoloji vəziyyətinin yaxşılaşdırılması, QSC-nin yeni tərəfdaşlar ilə əməkdaşlığının genişləndirilməsi və qlobal maliyyə böhranı şəraitində müəssisənin iqtisadi imkanlarının yaxşılaşdırılmasıdır.
"Salyan oil" şirkəti 2009-cu ildə işlənən yataqlarda dörd istismar quyusunun qazılmasını planlaşdırır.
2006-cı ilin mart ayının 1-də Abşeron Yarımadasındakı mövcud ekoloji problemlərin həll edilməsi üçün yaradılan Ekol Mühəndislik Xidmətlərinin həmtəsisçiləri Azərbaycan Respublikası Dövlət Neft Şirkəti (51%) və xarici investor "Lancer Services S.A." Şirkətidir (49%), bu barədə ARDNŞ-in rəsmi internet saytında deyilir.