Azərbaycan, Bakı, 07 avqust / Trend /
Rusiyanın qaz inhisarçısı Rusiya "Qazprom" ASC tərəfindən "Mozdok (Rusiya) - Qazıməmməd (Azərbaycan)" magistral qaz kəmərinin avtomobil yolu üzərindən keçidlərinin kapital təmiri üçün layihə-kəşfiyyat işləri üzrə elan olunan tenderin qalibi "Layihə-Texnologiya Mərkəzi" MMC (Mahaçkala şəhəri) olub, bu barədə məlumatda deyilir. Tender hələ iyun ayında elan olunmuşdu.
Məlumatda deyildiyi kimi, tender dörd obyekt çərçivəsində işlərin həyata keçirilməsini nəzərdə tutur.
İyunun sonunda ARDNŞ və "Qazprom" Bakıda Azərbaycan qazının alqı-satqısı haqqında müqavilə imzalayıblar. Qazın "Mozdok -Qazıməmməd" boru kəməri ilə tədarükü nəzərdə tutulub.
ARDNŞ prezidenti Rövnəq Abdullayevin əvvəlcədən bildirdiyi kimi, müqavilə ildə qazın 500 milyon kubmetrdən az olmayaraq ixracı imkanı ilə beş il müddətinə nəzərdə tutulub. İxrac həcmləri qarşıdakı yarımil ərzində razılaşdırılacaq.
İlin sonuna kimi Azərbaycan və Rusiyanı birləşdirən Qazıməmməd qaz kəmərində onun revers rejimində işləməsi üçün texniki işlər keçiriləcək.
Bu il ərzində ARDNŞ öz yataqlarından səkkiz milyard kubmetr qaz hasil edəcək.
