Azərbaycan, Bakı, 14 avqust / Trend /
Yanvar-iyul aylarında "Şahdəniz" qaz-kondensat yatağından təxminən 763,6 milyon kubmetr qaz əldə edilib. 2008-ci ilin müvafiq dövründə bu rəqəm 1,2 milyard kubmetr olub. Bu barədə ARDNŞ-dən (Azərbaycan Respublikası Dövlət Neft Şirkəti) məlumat verilib.
Bu müddətdə əldə olunan qazın ümumi həcmindən təxminən 332 milyon kubmetr "Şahdəniz" layihəsində ARDNŞ-in iştirak payına düşür. Qalan hissə - təxminən 432 milyon kubmetr isə ARDNŞ tərəfindən alınıb.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.
Hazırda qaz Cənub Qafqaz kəməri vasitəsilə Gürcüstan və Türkiyəyə nəql olunur. "Şahdəniz"in işlənməsi layihəsinin "Mərhələ-1" çərçivəsində 2009-cu ildə 9 milyard kubmetrdən çox qaz hasil olunacaq.
"Şahdəniz"in işlənməsinin ikinci mərhələsinin realizəsinə 2014-cü ildə başlamaq planlaşdırılır. İkinci faza çərçivəsində ümumilikdə 20 mlrd. kubmetrədək qaz hasil etmək planlaşdırılır.
