Azərbaycan, Bakı, 04 sentyabr / Trend , müxbir E.İsmayılov /
Bakıda oktyabrın 13-14-də Azərbaycanın Sənaye və Energetika Nazirliyinin və ATƏT-in təşkilatçılğı ilə alternativ və bərpa oluna bilən enerji mənbələrinə həsr olunan konfrans keçiriləcək. Bu barədə cümə günü nazirliyin mətbuat xidmətinin rəhbəri Azər Mənsimli bildirib.
İyul ayında Azərbaycan Prezidenti İlham Əliyev Alternativ və Bərpa Oluna Bilən Enerji Mənbələri üzrə Dövlət Agentliyinin yaradılması barədə fərman imzalayıb. Fərmana əsasən, bu agentliyin işçilərinin ştatı 25 nəfər təşkil edir.
Azərbaycanın sənaye və energetika naziri Natiq Əliyevin "Azərbaycan" qəzetində dərc edilən bəyanatında deyildiyi kimi, aparılan hesablamalara əsasən, gələcəkdə alternativ enerji mənbələrindən istifadə hesabına bu sektorun Azərbaycanda istehsal edilən elektrik enerjisinin ümumi həcmindəki payı təxminən 5-7 faiz təşkil edəcək. İstilik enerjisinin istehsalı sahəsində alternativ enerji mənbələrinin perspektiv payı ümumi həcmin 10 faizini təşkil edə bilər.
"Alternativ enerji mənbələrindən istifadənin nəticəsi istilik elektrik stansiyalarının işlənməsi zamanı yanacağa qənaət edilməsi, eyni zamanda atmosferə zərərli maddələrin buraxılmasının azalması ola bilər. Azərbaycanın coğrafi mövqeyi və iqlim şəraiti müxtəlif ölkələrdə geniş yayılan ekoloji cəhətdən təmiz alternativ enerji mənbələrinin istifadəsinə imkan verir", - bəyanatda deyilir.
Məqalə müəllifi ilə əlaqə ünvanı: [email protected]
