Azərbaycan, Bakı, 16 sentyabr / Trend , müxbir E.İsmayılov /
ARDNŞ-nin (Azərbaycan Respublikası Dövlət Neft Şirkəti) İrana beş milyard kubmetr həcmində qaz tədarük etmək planları yoxdur. Bu barədə çərşənbə günü ARDNŞ-nin yüksək vəzifəli nümayəndəsi deyib.
"İranla az həcmlə tədarükə başlamaq razılığı olub. Tədarükün artırılması bu istiqamətdə nəqli həyata keçirən boru kəmərindən asılı olacaq", - ARDNŞ nümayəndəsi deyib.
Onun sözlərinə görə, İrana qaz tədarükü artırmaq üçün boru kəmərində təmir işlərinin, xüsusən də kompressor stansiyalarının yenilənməsi üzrə işlərin aparılması lazımdır.
Hazırda ARDNŞ sutkalıq "svop" əməliyyatları çərçivəsində İrana təxminən 1,2 milyon kubmetr qaz tədarük edir. Qaz sonra Naxçıvan Muxtar Respublikasına verilir.
"Sözügedən mərhələdə infrastruktur İrana sutkada təxminən 2,5 milyon kubmetr qaz göndərməyə imkan verir. Lakin bunun üçün bu istiqamətdə yerləşən hər iki kompressor stansiyasında işləmək lazımdır. Azərbaycanda qüvvədə olan qaydalara əsasən, bir kompressor stansiyası işləməlidir, ikincisi isə ehtiyatda olmalıdır", - ARDNŞ nümayəndəsi deyib.
Ötən il Azərbaycan artıq İrana kommersiya şərtlərində 30 milyon kubmetr qazın tədarükünü həyata keçirib.
Azərbaycan və İranı 1474,5 kilometr uzunluğunda (o cümlədən Azərbaycan ərazisində 296,5 kilometr) "Qazı Məhəmməd-Astara-Bind-Biand" qaz kəməri əlaqələndirir. Onun buraxılış gücü ildə 10 milyard kubmetrdir. Bu marşrut 1971-ci ildə istifadəyə verilən "Qazax-Astara-İran" boru kəmərinin qoludur. Bu istiqamətdə üç kompressor stansiyası tikilib - Qazı Məhəmməd, Ağdaş və Qazaxda. Qaz-nəqliyyat sistemi 55 atmosfer təzyiqinə hesablanıb. Boru kəmərinin diametri 1200 millimetrdir.
NICO Milli İran Şirkəti "Şahdəniz" iri qaz yatağının işlənməsi layihəsində 10 faizlik pay ilə iştirak edir. "Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.
Məqalə müəllifi ilə əlaqə ünvanı: [email protected]