Azərbaycan, Bakı, 01 oktyabr / Trend , müxbirlər Ü.İsmayılov, E.İsmayılov/
2010-cu ilin yazında ARDNŞ Bakı şəhərinin qaz sisteminin yenidən qurulmasına başlayacaq. Bu barədə cümə axşamı "Azəriqaz" İstehsalat Birliyinin rəhbəri Əkbər Hacıyev bildirib.
"Layihə hazırlanacaq və çox güman ki, yazdan etibarən Bakının yenidən qazlaşdırılması üzrə işlərə başlanacaq, sözügedən işlər iki il ərzində başa çatacaq. Bu zaman ərzində paytaxtın bütün rayonları yenidən qazlaşdırılacaq", - Hacıyev deyib.
Onun dediyi kimi, hazırda layihənin smetasının hazırlanması üçün xarici şirkətlərlə danışıqlar aparılır.
Əkbərovun qeyd etdiyi kimi, Bakının yenidən qazlaşdırılması məsələsi aktualdır, çünki paytaxtın qazpaylama sistemi köhnəlib və qaz təzyiqinin artırılması zamanı borularda qaz sızması baş verir ki, bu da partlayış təhlükələrini artırır. Sistemdə qaz təzyiqinin azalması da boru kəmərlərinin köhnəlməsi ilə əlaqədardır.
Hacıyev paytaxtın qazlaşdırma sisteminin yenidən qurulması layihəsinin dəyərini açıqlamayıb. "Layihənin dəyəri smetanın tərtib edilməsindən sonra məlum olacaq", - o bildirib.
Hacıyevin qeyd etdiyi kimi, Bakıda və bütün rayon mərkəzlərində smart tipli sayğaclar quraşdırılacaq.
Köhnə abunəçilərə yeni sayğaclar ARDNŞ-nin hesabına quraşdırılacaq, yeni abunəçilər isə sayğacları öz vəsaitləri hesabına alacaqlar. Yaxın illərdə bütün ölkədə bu sayğaclar quraşdırılacaq, belə ki, qaz istehlakına görə yığımlar bu sayğacların tətbiq edilməsi nəticəsində 100 faiz təşkil edir.
Məqalə müəllifi ilə əlaqə ünvanı: [email protected]
