Azərbaycan, Bakı, 28 oktyabr / Trend /
Azərbaycan-Türkiyə birgə müəssisəsi "SOCAR-A.S.M" Qazaxıstandan "Barja 52-Parker Drilling" tipli barj əldə edib. Bu barjdan batan gəmilərin qaldırılması üçün istifadə ediləcək. ARDNŞ bu barədə çərşənbə günü məlumat yayıb.
Yeni barj ARDNŞ-nin Xəzər Dəniz Neft Donanmasının "İrgiz" yedək gəmisi ilə Qazaxıstanın Bautino limanından Bakıya gətirilib. Yeni barjda yükgötürmə qabiliyyəti 100 ton və 63 ton olan iki kranın qurulması, həmçinin 20 nəfərlik yaşayış blokunun tikintisi planlaşdırılıb.
Azərbaycan-Türkiyə birgə müəssisəsi olan "SOCAR-A.S.M." 2007-ci ildə ekoloji məqsədlərlə, dəniz dibinin və hövzəsinin işlənmiş metallardan - dağılmış estakadalardan, fəaliyyətsiz boru xətlərindən və lazımsız, köhnə özüllərdən, dəmir-beton kəsintilərindən təmizlənməsi üçün təsis edilib. Müəssisə indiyə qədər Xəzər dənizində batmış 20-dən artıq gəminin qalıqlarını çıxarıb.
Gəmilərin qaldırılması üçün daha güclü kranlara və yedək gəmilərinə ehtiyac var idi. Bu məqsədlə Türkiyədən 25 tonluq kran gəmisi və "Əlibaba" adlı güclü yedək gəmisi gətirilib. Bunlar aparılan işlərin həcmini bir neçə dəfə artırmağa imkan verir.
