...

AÇG layihəsi çərçivəsində ARDNŞ-nin gəlirləri 5 milyard dollar təşkil edib

Energetika Materials 12 Noyabr 2009 16:10 (UTC +04:00)

Trend-i buradan izləyin

Azərbaycan, Bakı, 12 noyabr / Trend , müxbir E.İsmayılov/

İndiyədək "Azəri-Çıraq-Günəşli" (AÇG) dəniz yataqlar blokunun işlənməsi layihəsi çərçivəsində ARDNŞ-nin gəlirləri 664,5 milyon dollarlıq ödəmələrlə 5 milyard dollar təşkil edib. Bu barədə ARDNŞ-nin iqtisadi məsələlər üzrə vitse-prezidenti Süleyman Qasımov "Vergilər" qəzetinə müsahibəsində bildirib.

"Bu layihə çərçivəsində yanvar-sentyabr aylarında şirkətin gəlirləri 464,5 milyon dollar, ödəmələri isə 56,2 milyon dollar təşkil edib", - Qasımov deyib.

"AÇG layihəsi üzrə hasilatın pay bölgüsü və birgə işlənməyə dair razılaşma 1994-cü il sentyabr ayında imzalanıb. Razılaşmanın fəaliyyət müddəti 30 ildir. "Çıraq" yatağında hasilata 1997-ci ildə, "Mərkəzi Azəri" yatağında 2005-ci ildə, "Qərbi Azəri" yatağında 2006-cı ildə, "Şərqi Azəri" yatağında isə 2006-cı ildə başlanıb", - Qasımov deyib.

"Azəri-Çıraq-Günəşli" yataqlar blokunun işlənmə layihəsinin səhmdarları: BP (operator - 34,1%), Chevron (10,2%), ARDNŞ (10%), INPEX (10%), StatoilHydro (8,6%), ExxonMobil (8%), TPAO (6,8%), Devon (5,6%), ITOCHU (3,9%), Hess (2,7%).

Qasımovun sözlərinə görə, ARDNŞ yanvar-sentyabr aylarında öz fəaliyyəti zamanı 2,85 milyard manatdan çox gəlir əldə edib. Şirkətin balans mənfəəti isə 981,8 milyon manat olub.

"Dünya bazarında neft və neft məhsullarının qiymətinin azalması şirkətin gəlirlərinə də təsir edib və bu ilin 9 ayı ərzində gəlirlər keçən illə müqayisədə xeyli azalıb", - Qasımov deyib.

Onun sözlərinə görə, ARDNŞ yanvar-sentyabr ayılarında beynəlxalq bazarda 555,1 milyon manatlıq 1,7 milyon tondan çox neft məhsulları satıb. Ötən il isə 2 milyon tonluq neft məhsulundan 1,3 milyard manata yaxın gəlir əldə edilmişdi.

742,5 milyon manat həcmində olan ümumi azalmadan 565,3 milyon manat neft və neft məhsullarının payına düşüb.

"Bu ilin yanvar-sentyabr aylarında 576,9 milyon manatlıq 1,8 milyon tondan çox neft ixrac edilib. Ötən ilin müvafiq dövründə isə 603,6 milyon manatlıq 947,6 min ton neft ixrac edilib, - Qasımov deyib. - İxrac edilən neftin həcminin iki dəfə artmasına baxmayaraq, gəlirlərdə azalma müşahidə edilib".

Ölkənin daxili bazarında 941,9 milyon manatlıq 2,24 milyon ton neft məhsulları satılıb. Keçən il isə 129,6 milyon manatlıq 595,9 min ton neft məhsulları satılıb.

Qasımovun sözlərinə görə, bu ilin yanvar-sentyabr aylarında 2,5 milyard manata yaxın qaz və qaz məhsulları satılıb. Ötən ilin müvafiq dövründə bu göstərici 3,35 milyard manata yaxın olub.

Bu ilin doqquz ayı ərzində ARDNŞ-nin Neft-Qaz Çıxarma İdarəsi tərəfindən hasil edilən bir ton neftin maya dəyəri beynəlxalq maliyyə hesabatlılığı standartlarına müvafiq olaraq 62,8 manat təşkil edib ki, bu da keçən ilin müvafiq göstəricisindən 5,2 manat azdır. Doqquz ay ərzində ARDNŞ-nin satış rentabelliyi göstəricisi 27,7 faiz təşkil edib.

Noyabrın 12-nə olan rəsmi məzənnə 0,8029 AZN/USD təşkil edir.

Məqalə müəllifi ilə əlaqə ünvanı: [email protected]

Xəbər lenti

Xəbər lenti