Azərbaycan, Bakı, 06 yanvar / Trend /
"ARDNŞ Xəzərin Azərbaycan sektorunda "Bulla dəniz" yatağında hasilat platformasının genişləndirilməsi üzrə işlər aparır", -bu barədə ARDNŞ-dan çərşənbə günü yayılan məlumatda deyilir.
Platformanın genişləndirilməsi 4 əlavə blokun qurulması hesabına planlaşdırılır.
3 blok Heydər Əliyev adına Dərin özüllər zavodunda, bir blok isə "Neftqaztikinti" trestinin inşaat-montaj meydanında tikilib. Hər blokun hündürlüyü 43 metr, çəkisi isə 170 tondur. Yaxın günlərdə bu blokların platformaya göndərilməsi və işlərin 3 ay ərzində yekunlaşdırılması planlaşdırılır. Modernləşmədən sonra platformadan yeni quyuların qazılması planlaşdırılır. İlk növbədə 5700 metr dərinliyi olan quyu qazılacaq.
"Bulla Dəniz" yatağı 1975-ci ildən istismardadır. 34 il ərzində yataqdan 62 milyard kubmetr qaz, 11 milyon ton neft və kondensat hasil edilib.
Yataq Nərimanov adına Neft Qaz Hasilatı İdarəsinin balansındadır. "8 mart yatağı" və Ümid perspektivli qaz kondensat strukturu da bu idarənin balansındadır.
