Azərbaycan, Bakı, 19 yanvar / Trend , müxbir E.İsmayılov/
"Azəriqaz" İstehsalat Birliyi yanında "Bakqaz" İdarəsi (Bakıda qazın paylanması və satışı) tərəfindən Bakı şəhərinin qaz sisteminə təxminən 2,45 milyard kubmetr məişət qazı ötürülüb ki, bu da praktiki olaraq 2008-ci ildəki göstərici ilə eynidir. Bu barədə çərşənbə axşamı İdarədəki mənbə bildirib. "Azəriqaz" ARDNŞ-nin (Azərbaycan Respublikası Dövlət Neft Şirkəti) tərkibinə daxildir.
"2009-cu ilin yekunlarına əsasən demək olar ki, paytaxtın qaz sisteminə 2,448 milyard kubmetrdən çox qaz ötürülüb", - mənbə deyib.
Onun sözlərinə görə, Bakının qaz sisteminə 2009-cu ilin dekabrında 2008-ci ilin analoji dövründə ötürülmüş 334,4 milyon kubmetr qaza nisbətdə 317,5 milyon kubmetr məişət qazı ötürülüb.
2008-ci ildə "Bakqaz" şəhərin qaz sisteminə qaz verilişinin mövsümi rejimindən (yay və qış mövsümü) tamamilə imtina edib. Bundan sonra verilən qazın həcmi istehlakçıların tələbatı ilə müəyyən edilir. Mövsümi rejimin tətbiq edilməsi bir çox məntəqələrdə sayğacların olmaması ilə əlaqədardır. Hazırda Bakı qaz şəbəkəsi abunəçilərinin 100 faizi sayğacla təmin olunub. Əvvəl yay mövsümündə qazın sutkalıq verilişi 3-4 milyon kubmetr, qışda isə 10-13 milyon kubmetr təşkil edirdi.
