Azərbaycan, Bakı, 20 fevral / Trend , müxbir E.İsmayılov/
Hazırda Xəzər dənizinin Azərbaycan sektorunda "8 mart" dəniz yatağında yüksəkdebitli istismar quyusunda 1790 metr qazma işləri həyata keçirilib. Quyunun nəzərdə tutulan dərinliyi 5800 metrdir. Bu barədə yataqdakı işləri öz vəsaiti hesabına aparan ARDNŞ-dəki mənbə şənbə günü bildirib.
"Qazma işləri normal templə gedir. Artıq dərinlik 1790 metrə çatıb", - mənbə deyib.
Onun sözlərinə görə, əgər qazma işlərində maneələr olmasa, bu ilin sonunda başa çatdırılmalıdır.
ARDNŞ əvvəlcə yeni quyunun qazılmasını 578 saylı platformada planlaşdırırdı, lakin burada qazma qurğusunun yerləşdirilməsi zamanı digər quyularda hasilat çətinləşirdi. Bu səbəbdən onun 730 saylı platformaya köçürülməsi və məhz burada qazma işlərinə başlanmasına dair qərar verildi.
"Hazırda "8 mart" yatağı vasitəsilə sutka ərzində 400 min kubmetr qaz istehsal olunur. Şirkətin geoloqları artıq gələcək qazma işlərinin aparılması üçün doqquz nöqtə təyin ediblər", - ARDNŞ-nin məlumatında deyilir.
Azərbaycanda 59 neft-qaz yatağı var, onlardan 18-i dənizdə, qalanları isə quruda yerləşir.
