Azərbaycan, Bakı, 22 fevral / Trend , müxbir E.İsmayılov/
ARDNŞ (Azərbaycan Respublikası Dövlət Neft Şirkəti) bu il Gürcüstanda öz brendi altında 28-30 yanacaqdoldurma stansiyasını (YDS) açmaq niyyətindədir. Bu barədə bazar ertəsi ARDNŞ-nin Gürcüstanda törəmə müəssisəsi olan SOCAR Energy Georgia şirkətindəki mənbə məlumat verib.
"Bu il bizim böyük planlarımız var. Cari ildə Gürcüstanda ən azı 28-30 YDS-in açılması planlaşdırılır", - mənbə bildirib.
Onun sözlərinə görə, hazırda bütün ölkədə yeni YDS-lərin inşası gedir. Apreldən onların tədricən istismara verilməsinə başlanılacaq. "Apreldən başlayaraq hər ay 3-4 yanacaqdoldurma stansiyası açılacaq", - mənbə vurğulayıb.
Bu günlərdə ARDNŞ tərəfindən Gürcüstanda üç yeni YDS açılıb. Yeni YDS-lər üç yaşayış məntəqəsində açılıb: Tbilisi, Borjomi və Dapnaridə. Gürcüstanda ARDNŞ-nin ilk YDS-i 2008-ci ildə inşa edilib. Hazırda onların sayı 32-dir.
SOCAR Energy Georgia Gürcüstanın neft və neft məhsulları bazarında distribüterlik və marketinqlə məşğul olur. Şirkət əsasən Gürcüstan bazarında neft məhsulları və qaz satır.
SOCAR Georgia-nın təsisçiləri: ARDNŞ (51 faiz,) Petro-Trans FZCO (32,7 faiz) və İvan Çxartişvilidir (16,3 faiz).
