Аzərbaycan,Bakı, 2 iyun /Trend, müxbir A.Bədəlova/
"Nabukko" qaz kəməri layihəsi Azərbaycanın Avropa qaz bazarına birbaşa çıxışını təmin edəcək. Bunu çərşənbə günü Bakıda RWE Gas Midstream alman şirkətinin biznesin inkişafı üzrə meneceri Ceremi Ellis jurnalistlərə müsahibəsində deyib.
"Azərbaycan "Nabukko" layihəsinin həyata keçirilməsi üçün mühüm mənbələrdən biri hesab olunur. Ən əsası isə "Nabukko" Azərbaycanın Avropa qaz bazarına birbaşa çıxışını təmin edir", - Ellis bildirib.
Onun sözlərinə görə, "Nabukko" olduqca real layihə hesab olunur. Ellisin qeyd etdiyi kimi, bu layihə çərçivəsində "Nabukko" (NIC) beynəlxalq şirkəti böyük işlər aparır.
"Nabukko" layihəsinin Rusiya layihəsi olan "Cənub axını" ilə rəqabətinə gəlincə, Ellis qeyd edib ki, qaz tədarükçüləri qazın Avropaya nəqlində nisbətən aşağı və etibarlı qiymətləri olan marşruta üstünlük verəcəklər.
Ellis dediyi kimi, "Nabukko" bir neçə qaz nəqli mənbələrinə əsaslanan layihədir. Onun sözlərinə görə, hazırda diqqət mərkəzində üç mənbə var - Azərbaycan, Türkmənistan və İraq.
"Şahdəniz 2" layihəsinin 2016-cı ildə istifadəyə veriləcəyinə baxmayaraq, bu vaxta qədər digər tədarükçü ölkələrdən qaz alınacaq", - Ellis deyib.
Dəyəri 7,9 mlrd. avro olan "Nabukko" qaz kəmərinin tikintisi 2011-ci ilə nəzərdə tutulub. Boru kəmərinin maksimal ötürmə gücü ildə 31 mlrd. kubmetr təşkil edəcək. Qaz kəmərinin tikintisi 2010-ci ilə planlaşdırılıb. Layihənin iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər - 16,67 faiz paya malikdir.