Azərbaycan, Bakı, 18 iyun /Trend/
ARDNŞ "Kür-Qabırrı" və "Gəncə" neftli-qazlı rayonlarında seysmik kəşfiyyat işlərinə başlayıb. Bu barədə şirkətin məlumatında deyilir.
Cari ilin mart ayından Geofizika və Geologiya İdarəsinin "Kəşfiyyatgeofizika" İdarəsi "Azneft" İstehsalat Birliyinin sifarişi ilə "Cahandar-Tərsdəllər-Borsunlu" regional profil xətti boyunca Mezokaynozoy çöküntülərinin tektonik quruluşunun dəqiqləşdirilməsi, müxtəlif yaşlı çöküntü komplekslərində dəyişilmələrin öyrənilməsi, "Kür-Qabırrı" çaylararası neftli-qazlı rayonunun geoloji modelinin qurulması məqsədi ilə 2D çöl seysmik kəşfiyyat işlərinə başlayıb.
Aparılacaq əlavə tədqiqatlar, eyni zamanda, "Tərsdəllər" və "Cahandar" strukturlarının tektonik quruluşlarının dəqiqləşdirilməsi, müxtəlif yaşlı çöküntülər üzrə struktur xəritələrin qurulmasına xidmət edəcək.
Mürəkkəb yerüstü və dərinlik seysmogeoloji şəraitə malik "Kür-Qabırrı" caylararası neftli-qazlı rayonunda alınmış ilkin seysmik yazıların keyfiyyəti qənaətbəxşdir. Bundan başqa, "Kəşfiyyatgeofizika" İdarəsi cari ilin aprel ayından etibarən "Azneft" İB-nin sifarişi əsasında "Gəncə" neftli-qazlı rayonunun "Naftalan-Şimali Naftalan-Gödəkboz" sahəsində ümumi dərinlik nöqtəsi və sınan dalğalar üsulları ilə 2D seysmik kəşfiyyat işlərinə başlayıb.
İşlərin görülməsində əsas məqsəd sahənin üst Təbaşir-Paleogen çöküntülərinin geoloji quruluşunun dəqiqləşdirilməsi və neftlilik-qazlılığının proqnozlaşdırılmasıdır. Alınmış məlumatların ilkın təhlili əvvəlki illərdən fərqli olaraq yüksək keyfiyyətli seysmik yazıların alındığını göstərir. Bunun əsas səbəbi çöl işlərinin aparılma texnologiyasının yüksəldilməsi ilə yanaşı, yeni alınmış seysmik cihaz və avadanlıqların tətbiqi olub.
Geofizika və Geologiya İdarəsinin ayrı-ayrı strukturları üçün dünya standartlarına cavab verən avadanlıqların alınıb istehsalata tətbiq edilməsi aparılan işlərin səviyyəsini əsaslı surətdə yüksəltməyə imkan vermiş, neft və qaz yataqlarının axtarışı və kəşfiyyatı, yer qabığının dərinlik geoloji quruluşunun öyrənilməsi, quyu kəsilişlərinin geofiziki üsullarla tədqiqi, quyuların perforasiyası, yataqların işlənməsinə geofiziki nəzarət və neftli-qazlı sahələrdə mühəndisi-geoloji və topoqrafik işlərin aparılması sahəsində mühüm nailiyyətlər əldə edilmişdir.
