Azərbaycan, Bakı, 25 iyun /Trend/
Azərbaycan Prezidenti İlham Əliyevin Bakı buxtasının təmizlənməsinə dair göstərişlərinin icrası çərçivəsində ARDNŞ-nin Ekologiya İdarəsinin Ekoloji Tədqiqatlar Ekspedisiyasının əməkdaşları Xəzər Dəniz Neft Donanmasının "MPK 452" elmi-tədqiqat gəmisi vasitəsilə iyunun 21-də buxta ərazisində ekoloji monitorinq işlərini həyata keçiriblər. Bu barədə ARDNŞ-nin məlumatında deyilir.
Monitorinq zamanı seçilmiş stansiyalardan dib çöküntüləri, müxtəlif dərinliklərdən su nümunələri götürülüb, eləsə də həmin stansiyaların radiasiya fonu ölçülüb. Götürülmüş nümunələr fiziki-kimyəvi, hidroloji və bioloji cəhətdən tədqiq olunmaq üçün İdarənin Kompleks Tədqiqatlar Laboratoriyasına verilib.
Aparılan tədqiqatlar nəticəsində Bakı buxtasında çirkləndirici maddələrin - neftin, neft məhsullarının, fenolların qatılıqları, biogen elementlərin miqdarı, ağır metallar, fitoplanktonlar, zoobentos və mikroorqanizmlər, poliaromatik karbohidrogenlər və səthi aktiv maddələrin miqdarı müəyyən olunacaq. Alınmış nəticələr əsasında buxtanın təmizlənməsi üçün yeni tövsiyələr hazırlanacaq. Nəzərdə tutulur ki, ARDNŞ-nin Ekologiya İdarəsi tərəfindən bütün Abşeron yarımadasının sahil zolağı boyunca bu cür monitorinq işləri aparılsın.
