Azərbaycan, Bakı, 3 iyul /Trend, müxbir A.Bədəlova/
OPEK 2010-cu ildə Azərbaycandan neft tədarükünün sutkada 50 min bareldən sutkada 1,07 milyon barelədək artacağını proqnozlaşdırır.
OPEK-in neft bazarı üzrə məruzəsinə əsasən, ölkənin neft tədarükü üzrə ən yüksək göstəricisi ilin dördüncü rübündə sutkada 1,16 milyon barel müşahidə ediləcək. OPEK-in proqnozlarına görə, üçüncü rübdə tədarüklərin həcmi sutkada 1,1 milyon barel təşkil edəcək. Bu göstərici 2010-cu ilin ikinci rübündə sutkada 1,05 milyon barel olub.
Kartelin proqnozlarına görə, keçmiş sovet ölkələrinin tədarük etdikləri neftin həcmi bu il sutkada 230 min barel artaraq 13,15 milyon barel olacaq.
İlin üçüncü rübündə bu ölkələrin tədarük həcmi sutkada 13,1 milyon barel, dördüncü rübdə isə 13,23 milyon təşkil edəcək.
OPEK-ə daxil olmayan ölkələrin neft tədarükünün kartel tərəfindən bu il sutkada 51,7 milyon barel səviyyəsində olması proqnozlaşdırılır ki, bu da 2009-cu ildəki həcmdən sutkada 0,6 milyon barel çoxdur. İlin üçüncü rübündə bu ölkələrin tədarükünün həcmi 51,3 milyon təşkil edəcək ki, bu da ikinci rübdəkindən 51,6 milyon barel çoxdur.
İnkişaf etməkdə olan ölkələrin neft tədarükünün həcmi OPEK tərəfindən 2010-cu ildə sutkada 12,84 milyon barel səviyyəsində proqnozlaşdırılır ki, bu da 2009-cu ildəki həcmdən sutkada 260 min barel çoxdur.
OPEK bu il dünyanın neftə olan tələbatının sutkada 900 min barel səviyyəsində artımını proqnozlaşdırır.