...

Azərbaycanda "Şəfəq" və "Asiman" strukturları üzrə PSA tipli saziş payızda imzalanacaq - ARDNŞ

Energetika Materials 6 İyul 2010 16:49 (UTC +04:00)

Azərbaycan, Bakı, 6 iyul /Trend, müxbir E.İsmayılov/

Azərbaycan Respublikası Dövlət Neft Şirkəti (ARDNŞ) və Britaniyanın BP şirkəti Xəzərin Azərbaycan sektorundakı "Şəfəq" və "Asiman" perspektiv strukturlarının birgə kəşfiyyatı və işlənməsi layihəsi çərçivəsində PSA tipli müqaviləni cari ilin payızında imzalamaq niyyətindədirlər. Bu barədə çərşənbə axşamı ARDNŞ-nin yüksəkvəzifəli nümayəndəsi deyib.

Çərşənbə axşamı şirkətlər bu layihə çərçivəsində əsas kommersiya prinsipləri üzrə saziş imzalayıblar.

ARDNŞ nümayəndəsinin sözlərinə görə, müqavilə 30 il müddətinə imzalanacaq. Kəşfiyyat müddəti gələcəkdə üç il uzadılmaq imkanı ilə dörd il təşkil edəcək. İlkin mərhələdə iki quyunun qazılması planlaşdırılıb. İkinci mərhələdə isə ehtiyac olacağı təqdirdə daha iki quyu qazılacaq.

Tərəflər istismar müddətinə keçəndə layihə çərçivəsində birgə operatorluq edəcəklər. Müqavilədə pay bölüşdürülməsi 50x50 sxemi üzrə nəzərdə tutulub.

Sazişin imzalanması zamanı ARDNŞ prezidenti Rövnəq Abdullayevin dediyinə görə, strukturun ehtiyatları 300-500 milyard kubmetr qaz səviyyəsində qiymətləndirilir.

"Şəfəq" və "Asiman" strukturları Bakının cənub-şərqində və 125 km-də yerləşir. 2009-cu ilin iyulda ARDNŞ və BP şirkəti Londonda Xəzərin Azərbaycan sektorundakı "Şəfəq" və "Asiman" perspektiv strukturlarının birgə işlənməsinə dair "Qarşılıqlı anlaşma haqqında" memorandum imzalayıblar. Sazişin qüvvədə olma müddəti cari ilin iyulunda başa çatır.

Əvvəllər blokda kəşfiyyat işləri aparılmayıb, blok suyun 650-800 metr dərinliyində yerləşir.

BP "Azəri-Çıraq-Günəşli" neft-qaz yataqlar bloku və "Şahdəniz" qaz-kondensat yatağının işlənməsinə dair layihələrə rəhbərlik edərək Azərbaycanda əsas xarici neft investorudur. BP, həmçinin "Bakı-Tbilisi-Ceyhan" və "Bakı-Supsa" boru kəmərlərinin operatorudur.

Xəbər lenti

Xəbər lenti