Azərbaycan, Bakı, 4 avqust /Trend/
Yanvar-iyul aylarında Azərbaycanın daxili tələbatının ödənilməsi və ixrac əməliyyatlarının təmin olunması üçün 6,4 milyon kubmetrə yaxın qaz istifadə olunub. Bu barədə ARDNŞ-nin çərşənbə günü yayılan məlumatında deyilir.
Məlumatda deyildiyinə görə, istifadə edilən qazın ümumi həcmindən 5,46 milyard kubmetr sənaye müəssisələrinə, əhali və "Azərenerji" SC-yə ötürülüb. Qalan həcm Gürcüstan və Rusiya ilə ixrac əməliyyatlarının təmin edilməsinə, eləcə də Naxçıvan Muxtar Respublikasının (NMR) təbii qazla təmin olunmasına sərf edilib.
Yanvar-iyul aylarında ARDNŞ ölkənin qaz sisteminə 6,62 milyard kebmetrə yaxın qaz tədarük edib ki, bu da proqnozlaşdırılan həcmdən 668,45 milyon kubmetr çoxdur. Bundan başqa, sənaye müəssisələrini, əhalini və ixrac sazişləri çərçivəsində öhdəliklərin təmini üçün ölkənin yeraltı qaz anbarlarına 631 milyon kubmetrədək qaz vurulub. Bununla yanaşı, bu dövrdə qaz anbarlarına əlavə olaraq 857,8 milyon kubmetrə yaxın qaz vurulub.
NMR-i qazla təchiz etmək üçün İranla aparılan "svop" əməliyyatları çərçivəsində yanvar-iyul aylarında 210,56 milyon kubmetr qaz ötürülüb. İyulda bu göstərici 31 milyon kubmetrə yaxın olub.