Azərbaycan, Bakı, 18 avqust / Trend /
Bir az əvvəl ARDNŞ-in (Azərbaycan Dövlət Neft Şirkəti) tullantılarının utilizasiyası üzrə mərkəzin yenidən qurulması və tullantılara nəzarət sisteminin yaradılması üzrə keçirilən tenderin qalibi olmuş Amerikanın Mİ-LLC şirkəti layihənin TİƏ-nin hazırlanması çərçivəsində tullantıların yaranması mənbələrini və ARDNŞ-in tərkibinə daxil olan neft-qaz çıxartma idarələri və müəssisələrinin istehsal meydanlarında onların saxlanma şəraitini öyrənir. Bu barədə ARDNŞ-in yaydığı məlumatda deyilir.
Məlumatda deyildiyi kimi, həmçinin, Mİ-LLC şirkətinin mütəxəssisləri TİƏ-nin hazırlanması çərçivəsində bir sıra normativ aktlarla, eləcə də tullantıların yol verilən səviyyəsilə tanış olublar.
Eyni zamanda, bu layihə çərçivəsində görülən işlər, eləcə də işlərin cari vəziyyəti Bakıda ARDNŞ-in ekologiya məsələləri üzrə vitse-prezidenti Soltan Əliyev və Mİ-LLC şirkətinin vitse-prezidenti Sven Maykransla müzakirə olunub.
ARDNŞ və ABŞ-ın MI LLC şirkəti arasında ARDNŞ tullantılarının utilizasiyası üzrə mərkəzin yenidən qurulması və tullantılara nəzarət sisteminin yaradılması üçün texniki-iqtisadi əsaslandırmaya (TİƏ) hazırlıq barədə müqavilə mayın 20-də imzalanıb.
TİƏ-nin hazırlanması çərçivəsində həmçinin ARDNŞ müəssisələrinin fəaliyyəti nəticəsində əmələ gələn tullantıların həcmindən asılı olaraq müvafiq emaletmə texnologiyalarının seçilməsi də nəzərdə tutulub.
ARDNŞ tullantılarına nəzarət sistemi layihəsi üzrə işləri və tullantıların utilizasiyası mərkəzinin yenidən qurulması ARDNŞ və ABŞ-in Ticarət və İnkişaf Agentliyi (USTDA) arasında imzalanmış 572 min dollar dəyərində qrant müqaviləsi çərçivəsində həyata keçirilir. Müqavilə ötən il avqustun 13-də imzalanıb.
