Аzərbaycan, Bakı, 1 sentyabr /Trend/
Avqustun 31-də Gürcüstanın paytaxtı Tbilisi şəhərində Azərbaycan və Gürcüstanın hökumət başçıları tərəfindən imzalanmış "Azərbaycan Respublikası ilə Gürcüstan arasında nəqliyyat dəhlizinin rəqabət qabiliyyətinin artırılması üzrə qarşılıqlı anlaşma haqqında" Memoranduma əsasən yaradılmış Şuranın iclası keçirilib. Bu barədə çərşənbə günü ARDNŞ-nin (Azərbaycan Respublikası Dövlət Neft Şirkəti) məlumatında deyilir.
İclasda iki ölkə arasında tranzit dəhlizinin səmərəliliyinin artırılması və əlaqələndirilməsinin təmin edilməsinin əhəmiyyəti vurğulanıb, Xəzər və Qara dəniz sahillərindəki terminalların, Azərbaycan və Gürcüstan dəmir yollarının işinin effektivliyinin artırılması yolları müzakirə edilib, yükgöndərənlərlə, o cümlədən qazax şirkətləri ilə mövcud yükdaşıma müqavilələrinin icrası, onların yükgöndərən və tranzit ölkələrinin mənafelərinə uyğunluğu, nəqliyyat infrastrukturunun mövcud və perspektiv vəzifələri, nəql məsələlərinə olan baxış və münasibətlər, yeni nəql müqavilələrinə qazax tərəfinin baza baxışları və s. məsələlər müzakirə olunub.
Azərbaycan tərəfi tranzit daşımalarının uzunmüddətli müqavilələr çərçivəsində zəmanətli həyata keçirilməsinin əhəmiyyətini vurğulayıb, belə olan halda nəql infrastrukturunun inkişafı, onlara sərmayə qoyuluşunun artacağını qeyd edib.
Şuranın iclasında Gürcüstan tərəfindən Baş nazir Nika Qilauri, energetika naziri A.Xetaquri, Gürcüstan Dəmir Yolunun rəisi İ.Ezuqbaya, Azərbaycan tərəfindən nəqliyyat naziri Ziya Məmmədov, ARDNŞ prezidenti Rövnəq Abdullayev, "Azərbaycan Dəmir Yolları" QSC-nin sədri A.Əsgərov, "Azəryolservis" MMC-nin sədri C.Qurbanov, ARDNŞ-nin Sərmayələr İdarəsinin rəisi V.Əliyev iştirak ediblər.
