Azərbaycan, Bakı, 29 sentyabr /Trend/
"Azərenerji" ASC (Azərbaycanda elektrik enerjisinin istehsalı və paylanması) ölkənin elektrik enerjisi sisteminin yenilənməsi və onun Avropa standartlarına inteqrasiyası istiqamətində işlər görür. Bu barədə ASC-nin çərşənbə günü yaydığı məlumatda deyilir.
Məlumatda deyildiyi kimi, "Abşeron Yüksək Gərginlikli Elektrik Şəbəkəsi"nin balans mənsubiyyətinə aid olan bütün yarımstansiyalarda və elektrikötürücü xətlərdə avadanlıqların iş səmərəliliyinin artırılması məqsədilə bir sıra yenidənqurma və əsaslı təmir işləri aparılır.
Həmçinin, işlər 330 kilovoltluq 4-cü "Şirvan" hava xəttində də aparılır. Belə ki, əgər əvvəllər bu xətt birbaşa "Yaşma" yarımstansiyası ilə əlaqələnirdisə, artıq o, kəsilməklə 500 kilovoltluq "Abşeron" yarımstansiyasında tikilmiş yeni bölməyə daxil edilib və oradan çıxaraq 8-ci "Abşeron" hava xətti vasitəsilə "Yaşma" yarımstansiyasına ötürülür.
Əsas generasiya güclərinin mərkəzləşdiyi Mingəçevir şəhərindən "Abşeron" yarımstansiyasına iki xətt gəlir. Bunlar, hər birinin uzunluğu 250 kilometr olan 330 və 500 kilovoltluq "Abşeron" xətlərindən ibarətdir. Həmin xətlər relyef baxımından mürəkkəb olan Ağsu aşırımı və Şamaxı dağlarından keçir ki, güclü külək və ya qasırğalar baş verdikdə, təsadüfi hallarda da olsa belə, xətlərdən birində açılmalar qeydə alınır. Bu halda, digər xətt daha çox yüklənməyə məruz qalırdı. Bu da paytaxtın və ümumilikdə Abşeron yarımadasının dayanıqlı elektrik enerjisi təminatında problemlərə yol aça bilərdi.
Artıq 4-cü "Şirvan" hava xəttinin "Abşeron" yarımstansiyasına giriş-çıxışı təmin olunduqdan sonra təsadüf nəticəsində Mingəçevirdən gələn xətlərdə problem yaransa belə, təminat "Şirvan" İES vasitəsilə həyata keçiriləcək. Digər tərəfdən, enerjinin ötürülməsi "Yaşma" xətti ilə 8-ci "Abşeron" xəttinin əlaqələndiyi "Dərbənd" hava xətti və ya "Sumqayıt Elektrik Stansiyası" vasitəsilə təmin oluna bilər. Bu isə "Abşeron" yarımstansiyasının dayanıqlığının daha da artması deməkdir.