Azərbaycan, Bakı, 13 noyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) "Şəfəq" və "Asiman" perspektivli strukturlarının kəşfiyyatı və işlənməsi ilə bağlı PSA tipli müqaviləni Azərbaycan parlamentinin təsdiqinə təqdim etməyə hazırlaşır. Bu barədə şənbə günü ARDNŞ-nin prezidenti Rövnəq Abdullayev deyib. Müqavilə bu ilin oktyabrında ARDNŞ və Britaniyanın BP şirkəti arasında imzalanıb.
"Müqavilə artıq hazırdır və parlamentə təqdim olunacaq", - Abdullayev deyib.
Onun sözlərinə görə, hazırda müqavilə çərçivəsində işlərin başlaması üçün hazırlıq gedir.
Müqavilə 30 illik müddətə imzalanıb. Kəşfiyyat dövrü daha üç il müddətinə uzadılmaq imkanı ilə dörd ildir. Birinci mərhələdə iki quyunun qazılması planlaşdırılır. İkinci mərhələdə ehtiyac olarsa, daha iki quyu qazılacaq. İstismar mərhələsinə keçidlə tərəflər layihə çərçivəsində birgə operatorluq həyata keçirəcəklər. Şirkətlər layihədə bərabər pay hissələrinə malikdirlər.
Struktur ehtiyatları 300-500 milyard kubmetr qaz həcmində qiymətləndirilir.
"Şəfəq" və "Asiman" strukturları Bakıdan 125 kilometr cənub-şərqdə yerləşir. 2009-cu ilin iyulunda ARDNŞ və BP Londonda Xəzər dənizinin Azərbaycan sektorunda "Şəfəq" və "Asiman" perspektiv strukturlarının birgə geoloji kəşfiyyatı və işlənməsi üçün qarşılıqlı anlaşma haqqında memorandum inzalayıblar.
Əvvəllər blokda kəşfiyyat işləri aparılmayıb. O, dənizin dərinsulu hissəsində - suyun dərinliyinin təxminən 650-850 metr olduğu ərazidə yerləşir, rezervuarın dərinliyi 7 min metrdir.
ВР Azərbaycanda iri enerji layihələrinin iştirakçısıdır. Həmçinin, şirkət "Azəri-Çıraq-Günəşli" dəniz yataqları blokunun və "Şahdəniz" qaz kondensatı yatağının işlənməsi layihəsində iştirak edir, Bakı-Tbilisi-Ceyhan və Cənubi Qafqaz qaz kəmərinin (Bakı-Tbilisi-Ərzurum) səhmdarıdır.
