Azərbaycan, Bakı, 15 noyabr /Trend/
İyul-oktyabr aylarında Azərbaycanda hasil olunan neftin böyük hissəsinin ixrac olunduğu Bakı-Tbilisi-Ceyhan (BTC) boru kəməri ilə 860,4 min ton Türkmənistan nefti nəql olunub. Bu göstərici iyul-sentyabrda 659,5 min ton olub. Bu barədə Azərbaycan Dövlət Statistika Komitəsinin məlumatında deyilir.
Türkmənistan neftinin BTC ilə nəqli ARDNŞ-nin (Azərbaycan Respublikası Dövlət Neft Şirkəti) "Dragon oil" və Türkmənistanda neft hasilatı ilə məşğul olan digər şirkətlərlə müqaviləsi çərçivəsində həyata keçirilir.
"SOCAR Trading" şirkəti nefti Türkmənistandakı istehsalçılardan alır, onu Xəzər dənizi vasitəsilə Bakıyadək nəql edir. "BTC Co" şirkəti neftin bu həcmini BTC kəməri ilə nəql edir və Aralıq dənizindəki Ceyhan limanında onu "SOCAR Trading"ə təhvil verir.
Bundan əvvəl BTC ilə "Tengiz" yatağından "Tengizchevroil" (operator Chevron) şirkətinin Qazaxıstan nefti nəql olunub, lakin nəql şərtlərinin razılaşdırılmaması səbəbindən neftin vurulması cari ildən dayandırılıb.
"BTC Co"nun səhmdarları aşağıdakılardır: BP (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz ); "Total" (5 faiz); "İtochu" (3,40 faiz ); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
Boru kəmərinin gücü sutkada 1,2 milyon barel neft təşkil edir.