Аzərbaycan, Bakı, 19 noyabr /Trend, müxbir E.İsmayılov/
CIF liman Augusta şərtləri ilə Azərbaycanın yüngül neftinin qiyməti noyabrın 18-də 85,7 dollar/barel təşkil edib. Xarici tərəfdaşları ilə birgə 1997-ci ildən yüngül neft hasil edən ARDNŞ-dən (Azərbaycan Respublikası Dövlət Neft Şirkəti) cümə günü verilən məlumata görə, cümə axşamı neftin qiyməti çərşənbə gününə nisbətən 0,26 dollar/barel artıb.
"Azeri Light" neft növü Azərbaycanın "Azəri-Çıraq-Günəşli" yataqlar blokundan çıxarılır. Neft digər növlərlə qarışdırılmadan "Bakı-Tbilisi-Ceyhan" boru kəməri ilə Türkiyənin Ceyhan, dəmiryolla Gürcüstanın Batumi limanlarına çatdırılır. Bununla yanaşı, "Azeri Light" Bakı-Supsa boru kəməri vasitəsilə Gürcüstanın Supsa limanına ixrac olunur.
ARDNŞ-dən bildiriblər ki, FOB Türkiyənin Ceyhan limanı şərtləri ilə Azərbaycanın yüngül neftinin qiyməti noyabrın 18-də 84,79 dollar/barel təşkil edib ki, bu da əvvəlki qiymətdən 0,24 dollar/barel çoxdur.
Azərbaycan neftin URALS növünü də Novorossiysk limanından satır. Buraya xammal Bakı-Novorossiysk boru kəməri ilə çatdırılır. Keyfiyyətli Azərbaycan nefti Rusiyanın boru kəmərləri şəbəkəsində digər növlərlə qarışdırılır və Novorossiysk limanında URALS adı ilə satılır. Bu növ spesifikliyinə görə Azərbaycan neftindən keyfiyyət və qiymətcə aşağıdır.
Novorossiysk limanından yüklənən URALS neftinin qiyməti noyabrın 18-də 81,36 dollar/barel təşkil edib ki, bu da əvvəlki qiymətdən 0,05 dollar/barel azdır.
Şimal dənizində hasil olunan "Brent Dated" neft növünün qiyməti noyabrın 18-də 83,89 dollar/barel təşkil edib. Bu, əvvəlki qiymətdən 0,26 dollar/barel çoxdur.
