Azərbaycan, Bakı, 22 noyabr /Trend, müxbir E.İsmayılov/
Yanvar-oktyabr aylarında "Bakıelektrikşəbəkə" ASC (Bakıda elektrik enerjisinin satışı və paylanması ilə məşğul olur) "Azərenerji" ASC-dən (Azərbaycan regionlarında elektrik enerjisinin istehsalı və paylanması) yanvar-sentyabrdakı 6 milyard kilovat-saatdan çox elektrik enerjisinə qarşı 6,6 milyard kilovat-saat elektrik enerjisi alıb. Bu barədə "Bakıelektrikşəbəkə"nin rəsmi saytında yerləşdirilmiş məlumatda bildirilir.
2009-cu ildə "Bakıelektrikşəbəkə" "Azərenerji"dən 8,1 milyard kilovat-saata yaxın elektrik enerjisi alıb.
Məlumatda deyilir ki, oktyabrda ASC sentyabrdakı 537,8 milyon kilovat-saat elektrik enerjisinə qarşı, 559,5 milyon kilovat-saat elektrik enerjisi alıb.
"Azərenerji" ASC (Azərbaycanda iri elektrik enerjisi istehsalçsı) tərəfindən göndərilən elektrik enerjisi üzrə "Bakıelektrikşəbəkə"nin ödənişlərinin həcmi yanvar-oktyabr aylarında orta hesabla 88,14 faiz təşkil edib. Oktyabrda bu göstərici sentyabrdakı 95,3 faizə qarşı 92,6 faiz təşkil edib.
2009-cu ildə "Bakıelektrikşəbəkə"nin ödənişləri orta hesabla 84,44 faiz təşkil edib.