Azərbaycan, Bakı, 26 noyabr /Trend, müxbir E.İsmayılov/
2011-ci ilin yazında AMEC-Tekfen-Azfen (ATA) şirkətlər qrupu "Azəri-Çıraq-Günəşli" yatağında "Chirag oil project" çərçivəsində platforma üçün üst quruluşların bəzi elementlərinin və qazma obyektlərinin montajı üzrə işə başlayacaq. Bu barədə cümə günü neft-qaz bazarındakı mənbə deyib.
Onun sözlərinə görə, hazırda bu layihə çərçivəsində tikinti üçün lazım olan digər elementlərin hazırlanması üzrə işlər davam etdirilir.
"Martda tikilinin əsas hissəsinin formalaşdırılması üçün daha kiçik elementlərin montajı üzrə işlərə başlamaq planlaşdırılır", - mənbə bildirib.
Bundan əvvəl mənbənin dediyi kimi, platforma üçün üst quruluşların və buruq obyektlərinin tikinti prosesi 2,5 il vaxt aparacaq. Tikinti prosesi iki mərhələdən ibarətdir. Birinci mərhələ lazımlı elementlərin istehsalı, ikincisi onların montajıdır. Lazımlı elementlər mərhələlərlə hazırlanacaq, bundan sonra onlar tədricən montaj ediləcək.
Azərbaycan Beynəlxalq Əməliyyat Şirkəti (АBƏŞ) ilə müqaviləyə əsasən, ATA konsorsiumu üst modulların, buruq obyektlərinin tikintisi, eləcə də yığım, tənzimləmə və istismar sınaqları üzrə işləri görəcək. Bu müqavilənin dəyəri təxminən 340 milyon dollar təşkil edir.
"Azəri-Çıraq-Günəşli" yatağının işlənməsinin layihəsi çərçivəsində ATA artıq texnologiya platformalarından birinin üst quruluşlarının qurulması ilə məşğul olub.
"Chirag oil project" dənizin 170 metr dərinliyində qurulacaq yeni platformada "Qərbi Çırağ"ın tikintisini nəzərdə tutur.
"Chirag oil project" çərçivəsində tikinti işlərinin əksəriyyəti, o cümlədən əvvəlki layihələr üçün xaricdə tikilən platformanın buruq modulunun tikintisi Azərbaycanda həyata keçiriləcək.
"Chirag oil project" altı milyard dollar həcmində investisiyanı nəzərdə tutur.
AÇG-də neft hasilatının artırılması çərçivəsində tikiləcək yeni platformadan Azeri Light növlü neft hasilatının planlaşdırılan sutkalıq həcmi 183 min barel təşkil edəcək. Yeni platformadan səmt qazının gözlənilən sutkalıq həcmi 6,5 milyon kubmetri ötəcək.
Layihə çərçivəsində qabaqlayıcı qazma 2010-cu ilin birinci yarısını, 2012-ci ilin ikinci yarısını əhatə edəcək. Bu dövrdə qabaqlayıcı qazmanı "Dədə Qorqud" qurğusu aparacaq. Platformadan hasilatın 2013-cü ilin sonunda başlanmaq planlaşdırılıb.
Layihənin reallaşdırılması çərçivəsində 300 milyon barel neftin hasil edilməsi planlaşdırılır.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoil" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).
