Azərbaycan, Bakı, 26 noyabr /Trend, müxbirlər E.İsmayılov/
ВР şirkəti bu ilin üçüncü rübü ərzində "Chirag oil project" ("Azəri-Çıraq-Günəşli" yataqlar blokunda neft hasilatının artırılması) üzrə qabaqlayıcı qazma işləri çərçivəsində ikinci quyunun qazılmasına başlayıb. Bu barədə çərşənbə axşamı BP-nin rəsmi hesabatında deyilir.
"Chirag oil project" çərçivəsində qabaqlayıcı qazma proqramı 16 quyunun qazılmasını nəzərdə tutur.
Məlumata görə, üç rüb ərzində J-01 - birinci qabaqlayıcı quyunun qazılması ilə bağlı işlər başa çatıb. Artıq geotexniki quyunun qazılması da başa çatıb. Quyuların qazılması "Dədə Qorqud" qazma qurğusundan istifadə olunmaqla aparılır.
"Chirag oil project" dənizin 170 metr dərinliyində qurulacaq yeni platformada "Qərbi Çırağ"ın tikintisini nəzərdə tutur.
"Chirag oil project" çərçivəsində tikinti işlərinin əksəriyyəti, o cümlədən əvvəlki layihələr üçün xaricdə tikilən platformanın buruq modulunun tikintisi Azərbaycanda həyata keçiriləcək.
"Chirag oil project" altı milyard dollar həcmində investisiyanı nəzərdə tutur.
AÇG-də neft hasilatının artırılması çərçivəsində tikiləcək yeni platformadan Azeri Light növlü neft hasilatının planlaşdırılan sutkalıq həcmi 183 min barel təşkil edəcək. Yeni platformadan səmt qazının gözlənilən sutkalıq həcmi 6,5 milyon kubmetri ötəcək.
Layihə çərçivəsində qabaqlayıcı qazma 2010-cu ilin birinci və 2012-ci ilin ikinci yarısını əhatə edəcək. Bu dövrdə qabaqlayıcı qazmanı "Dədə Qorqud" qurğusu aparacaq. Platformadan hasilata 2013-cü ilin sonunda başlamaq planlaşdırılıb.
Layihənin həyata keçirilməsi çərçivəsində 300 milyon barel neft hasilatı planlaşdırılır.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoil" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).