Azərbaycan, Bakı, 9 dekabr /Trend, müxbir E.İsmayılov/
Xəzərin Azərbaycan sektorundakı "Şahdəniz" qaz-kondensat yatağının hazırlanmasında texniki operator olan Böyük Britaniyanın BP şirkəti yataqda altıncı hasilat quyusunun mənimsənilməsi üzrə işlər aparır. Bu barədə cümə axşamı neft-qaz bazarındakı mənbə məlumat verib. Bundan əvvəl qazma işləri 6959 metr dərinlikdə dayandırılmışdı.
"Qazma işləri başa çatıb. Hazırda yeni quyunun mənimsənilməsi üzrə işlər aparılır", - mənbə bildirib. Quyunun mənimsənilmə prosesi və onun istismara verilməsi 1-2 ay sürəcək.
Bundan əvvəl mənbənin bildirdiyi kimi, daha bir hasilat quyusu digər quyulardan birinin planlı təmir işləri dövründə yataqda qaz hasilatını balanslaşdırmağa imkan verəcək.
Hazırda yataqda dörd quyudan qaz hasilatı həyata keçirilir (bir quyu saxlanılıb). "Şahdəniz"də platformadan sutkalıq qaz hasilatı rayonda 20-23 milyon kubmetr təşkil edir. Yeni quyunun istismara verilməsindən sonra o, sutkada 25-26 milyona çata bilər.
Yataqda ən yüksək hasilat 8,6 - 9 milyard kubmetr səviyyəsində proqnozlaşdırılır. Proqnozlara əsasən, yatağın işlənməsinin ikinci mərhələsində qaz hasilatının həcmini ildə 25 milyard kubmetrə qədər artırmaq olacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
