Azərbaycan, Bakı, 18 dekabr /Trend/
Yanvar-noyabr aylarında Azərbaycan "Şahdəniz" qaz-kondensat yatağından iki milyard kubmetrdən çox qaz alıb. Ötən ilin analoji dövründə bu göstərici bir milyard kubmetrdən çox olub. Bu barədə şənbə günü ARDNŞ-nin (Azərbaycan Respublikası Dövlət Neft Şirkəti) məlumatında deyilir.
Göstərilən dövrdə alınan qaz həcmindən 529,4 milyon kubmetr ARDNŞ-nin "Şahdəniz" layihəsindəki iştirak payıdır, yerdə qalan 1,6 milyard kubmetr qaz isə ARDNŞ tərəfindən alınıb.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, "Statoil Hydro" - 25,5 faiz, NICO - 10 faiz, "Total" - 10 faiz, "LukAgip" - 10 faiz, TPAO - 9 faiz, ARDNŞ - 10 faiz.
Hazırda qaz Cənubi Qafqaz qaz kəməri ilə Gürcüstana və Türkiyəyə nəql olunur.
Bu il yataqdan 7,6 milyard kubmer qaz hasil olunub. Yataqda hasilatın ən son həddi 8,6-9 milyard kubmetr təşkil edəcəyi güman edilir. Proqnozlara görə, yatağın işlənməsinin ikinci mərhələsi çərçivəsində burada qaz həcminin ildə 25 milyard kubmetrədək artırılması mümkündür.
