Azərbaycan, Bakı, 22 dekabr /Trend, müxbir A.Bədəlova/
Avropa ölkələrinin qaz idxalından asılılığı ildən-ilə artığı halda, daxili hasilat nəzərəçarpacaq dərəcədə azalır. Avropa Komissiyasının saytında "2020-ci il və enerji infrastrukturlarının prioritetləri - Avropa enerji sisteminin birləşdirilməsi proqramı" adı altında dərc olunan sənədə görə, Avropa İttifaqı ölkələrinin qaz idxalından asılılığı 2020-ci ilədək 73-79 faizədək, 2030-cu ilə qədər isə 81-89 faizədək artacaq. İdxalda artım daxili ehtiyatların tükənməsi nəticəsində baş verir.
Sənədə görə, bu dövrdə Avropanın ümumi enerji balansında kömür və neftin payı azalır, regionda qaza tələbat isə sabit qalır.
Müxtəlif ssenarilərdən asılı olaraq Avropanın əlavə idxal etdiyi qaz həcmləri 2020-ci ilədək 44-dən 148 milyon tonadək və 2030-cu ilədək 61-dən 221 milyon tonadək neft ekvivalentində (2005-ci illə müqayisədə) tərəddüd edir.
Bu gün Aİ ölkələrinin əsas xarici qaz tədarükçüləri Rusiya, Norveç və Əlcəzairdir. Avropa qaz ittifaqı "Eurogas"ın məlumatına görə, ötən il bu ölkələrin payına müvafiq olaraq 23, 20 və 10 faiz düşüb.
Aİ-nin 27 ölkəsində daxili qaz hasilatı 2009-cu ildə doqquz faiz, yəni 182 milyard kubmetrədək azalıb.
Avropa ölkələri planlaşdırılan boru kəmərləri hesabına yeni qaz tədarükü mənbələri gözləyirlər. Bu layihələrdən biri Avropa ölkələrininyeni enerjidaşıyıcıları mənbələri və marşrutları ilə təchiz edəcək "Nabukko" qaz kəməri layihəsidir. Bu kəmər Xəzər regionundan və Yaxın Şərq ölkələrindən Aİ ölkələrinə qaz nəqlini nəzərdə tutur. Boru kəməri ilə "mavi yanacağ"ın ilk nəqli 2015-ci ildə gözlənilir.
"Eurogas"ın proqnozlarına görə, Aİ-nin 27 ölkəsində qaza tələbat 2030-cu ilə kimi 637 milyard kubmetrədək artacaq.
...
